Qazaqstandyq joǵary synyp oqýshylary Brazılııanyń Portý-Alegrı jáne Nový Gambýrg qalalarynda ótken halyqaralyq ǵylymı jumystar baıqaýyna qatysty.
Shyǵarmashylyq jarys Mostra Internacional de Ciência e Tecnologia (Mostratec) 31-shi Halyqaralyq bilim kórmesi sheńberinde ótken. Sharany uıymdastyrǵan - Brazılııanyń Liberato qory. Bul qor ǵylym men tehnologııalardy damytý úshin bilikti mamandar daıyndaýǵa yqpal etetin qoǵamdyq ınstıtýt.
Mostratec kórmesiniń maqsaty - oqýshylardyń jaratylystaný ǵylymdaryna degen qyzyǵýshylyǵyn yntalandyrý, ǵylym men tehnıkanyń túrli salalaryndaǵy shyǵarmashylyq qyzmetke tartý, halyqaralyq yntymaqtastyqty damytýǵa qoldaý kórsetý jáne oqýshylarmen jumys isteý úshin mamandardy tartý.
Qatysýshylar qazylar alqasynyń nazaryna matematıka, fızıka, hımııa jáne ınformatıkadan zertteý jumystaryn usyndy. Baıqaý qorytyndysy boıynsha, qazaqstandyq oqýshylar 7 altyn, 6 kúmis jáne 7 qola medalǵa ıe boldy. Úzdik jumystardyń avtorlary dıplomdarmen, baǵaly syılyqtarmen jáne bilim granttarymen marapattaldy.