Búgin Astanadaǵy Oqýshylar saraıynda Táýelsizdiktiń 25 jyldyǵy men BUU Balalar qorynyń (IýNISEF) 70 jyldyǵyna oraı, Dúnıejúzilik balalar kúnin merekeleý aıasynda «Balaǵa meıirimdi Qazaqstan» taqyrybynda halyqaralyq konferensııasynyń ashylý saltanaty ótti. Bul is-shara Qazaqstan Prezıdenti janyndaǵy Áıelder isteri jáne otbasylyq-demografııalyq saıasat jónindegi ulttyq komıssııanyń, Qazaqstan Parlamenti Májilisiniń, Qazaqstandaǵy Balalar quqyǵy boıynsha ýákili jáne elimizdegi BUU Balalar qorynyń (IýNISEF), «Samuryq-Qazyna» AQ qoldaýymen, sondaı-aq, Bilim jáne ǵylym mınıstrliginiń uıymdastyrýymen ótti.
Halyqaralyq konferensııanyń maqsaty – «Máńgilik el» jalpyulttyq patrıottyq ıdeıasy negizinde jas urpaqtyń boıynda baı rýhanı qundylyqty, olardyń azamattyq ustanymyn qalyptastyrý.
Saltanatty sharanyń ashylýynda sóz sóılegen Memlekettik hatshy Gúlshara Ábdiqalyqova osyndaı mańyzdy jıynǵa qatysýǵa kelgen balalarǵa rızashylyǵyn bildirdi. Memlekettik hatshy óz sózinde Qazaqstan balalary men jasóspirimderiniń óz daryndylyǵy jaǵynan álemniń 100 eli arasynda 12 orynda turǵanyn atap ótti.
«Bıyl 1200 bala halyqaralyq jarystarda júldeli oryndarǵa ıe boldy. Jalpy, daryndylyq jaǵynan alǵanda elimizdiń balalary dúnıejúzindegi 100 memlekettiń ishinde 12-shi oryndy enshilep otyr. Al osydan 20 jyl buryn bul kórsetkish boıynsha elimiz 50-shi orynda turǵan edi. Qazir biz Qazaqstandy damyǵan 30 eldiń qataryna qosamyz degen maqsatty ustanyp júrgenimizdi bilesizder, al balalarymyz bul mejege ózderiniń bilim-bilikterimen-aq jetip qoıdy», – dedi Gúlshara Naýshaqyzy.
Sonymen qatar, Memlekettik hatshy Qazaqstan óz Táýelsizdigin alǵan ýaqyttan beri 13 halyqaralyq qujatty ratıfıkasııalaǵanyn, al bıylǵy jyldyń mańyzdy oqıǵasy Elbasy Nursultan Nazarbaevtyń tapsyrmasymen Bala quqyqtary jónindegi ýákil ınstıtýtynyń qurylýy bolǵandyǵyn atap ótti.
«Qazirgi tańda elimizde 5 mıllıonnan astam bala bar. 2000 jyldan bastap, Qazaqstandaǵy týý kórsetkishi 1,4 paıyzǵa artyp, jyl saıyn 400 myńǵa tarta sábı dúnıe esigin ashady. Jalpy alǵanda, Qazaqstandaǵy balalar quqyǵyn qorǵaý, olarǵa kómek kórsetý baǵytynda tıisti sharalar júrgizilip keledi», – dedi Gúlshara Naýshaqyzy.
Budan keıin Beıbitshilik jáne kelisim saraıynda odan ári jalǵasqan aýqymdy sharaǵa Memlekettik hatshydan bólek, Parlament Senatynyń Halyqaralyq ister, qorǵanys jáne qaýipsizdik komıtetiniń tóraıymy Darıǵa Nazarbaeva, Parlament Májilisiniń Halyqaralyq ister, qorǵanys jáne qaýipsizdik komıtetiniń tóraǵasy Máýlen Áshimbaev, Adam quqyqtary jónindegi ýákil Asqar Shákirov, BUU Balalar qorynyń (IýNISEF) atqarýshy dırektorynyń arnaıy ókili Marıelena Vıvıanı, Qazaqstandaǵy BUU Balalar qorynyń ókili Iýrıı Oksamıtnyı, elimizdegi Bala quqyqtary jónindegi ýákil Zaǵıpa Balıeva, sonymen qatar, Ulybrıtanııa, Shveısarııa, Norvegııa, Irlandııa, Germanııa, Slovenııa, Italııa, Horvatııa, Reseı, Belarýs, Ázerbaıjan, Latvııa, Lıtva sekildi elderden kelgen sheteldik sarapshylar qatysyp, sóz sóıledi.
Búgin halyqaralyq konferensııa aıasynda balalar festıvaliniń de ashylý rásimi ótti. Oǵan elimizdiń barlyq óńirinen kelgen 500-ge tarta bala qatysty. Olardyń barlyǵy – túrli áleýmettik jobalar konkýrstarynyń, ǵylymı jarystardyń, áleýmettik jobalardyń, respýblıkalyq jáne halyqaralyq shyǵarmashylyq baıqaýlardyń jeńimpazdary. Aldaǵy jyldardan bastap dástúrge aınalatyn bul konferensııa erteń odan ári jalǵaspaq. Bul kúni sheteldik jáne otandyq sarapshylar «Bala jáne zań», «Balanyń kózqarasyn qurmetteý», «Bala jáne otbasy», «Bala jáne onyń quqyqtary», «Balalar jáne zorlyq-zombylyqpen kúres», «Bala jáne densaýlyq», «Múmkindikteri shekteýli balalar», «Bala jáne kásipkerlik», «Bala jáne qorshaǵan ortanyń jaǵdaıy», «Balalar jáne bilim alý, mektepke deıingi tárbıe» sekildi máseleler boıynsha pikir almasyp, óz oılaryn ortaǵa salatyn bolady.
Láıla EDILQYZY,
"Egemen Qazaqstan".
Sýretterdi túsirgen Orynbaı Balmurat