Búgingi kúni Astanada 12 482 orynǵa arnalǵan 164 qonaq úı bar. EKSPO-2017 ótkiziletin kezeńde 2 829 orynǵa eseptelgen taǵy 23 qonaq úı keshenin paıdalanýǵa berý josparlanyp otyr. Sonymen qatar, qalada 664 orynǵa arnalǵan 25 hostel jumys isteıdi. 2017 jyldyń mamyr aıyna deıin qonaq úıler men hostelderde 15 975 oryn daıyndaý kózdelgen, dep habarlady abctv.kz Astana ákimdiginiń baspasóz qyzmetine silteme jasap.
Qala ákimdigi qonaqtardy ornalastyrýdyń qosymsha oryndary retinde joǵary oqý oryndary men kolledjderdiń jataqhanalary, jalǵa beriletin páterlerdi qarastyryp otyr. Búgingi kúni 1 710 oryndyq 10 kolledj jataqhanasy ázirlendi, olar respýblıka óńirlerinen keletin 40 000 oqýshyny ornalastyrýǵa múmkindik beredi. 2017 jyldyń mamyryna qaraı jataqhanalarda 9 000 oryn daıyndaý josparlanyp otyr.
Budan basqa, qala boıynsha 18 myń páter jalǵa beriledi, sonyń 3 myńy táýlik boıynsha tapsyrylady, bul 10 000 adamǵa 3-4 tósek oryndy qarastyrady.
Munymen qosa, EKSPO ótkiziletin kezeńdegi oqıǵalyq sharalardyń kúntizbesi jasaldy. Al týrısterge yńǵaıly bolýy jáne tildik kedergini azaıtý úshin «Friendly Taxi» jobasy iske qosyldy. Bul júıe Astana qalasynyń sheteldik qonaqtary men taksopark júrgizýshileriniń arasynda kommýnıkasııalar ortalyǵy bolyp tabylady. Joba iske qosylǵaly júıege qalalyq taksoparkterdiń 300 avtokóligi qosyldy.