Aǵymdaǵy jyldyń 1 qańtarynan bastap kúshine engen ónimdi jumyspen qamtý jáne jappaı kásipkerlikti damytý jańa baǵdarlamasynda jastardy tegin oqytý jáne olardy eńbekpen qamtýdyń múmkindikterin qamtamasyz etýdiń negizgi tásilderi qarastyrylǵan. Bul týraly QR Úkimeti otyrysynda QR densaýlyq saqtaý jáne áleýmettik damý mınıstri Tamara Dúısenova aıtty.
«Jańartylǵan baǵdarlamada basty nazar jappaı oqytý arqyly naqty daǵdylardy qalyptastyrýǵa aýdarylǵan. Oqytylǵandardyń alǵan daǵdylary olardyń jumysqa ornalasý nemese jeke isin ashý múmkindigin arttyrady. Buǵan Jumyspen qamtý ortalyqtary men burynǵydaı aýyldarda ǵana emes, qalalarda da shaǵyn nesıelendirý quraldaryn qoldaný keńeıtilgen jappaı kásipkerlikti damytý sharalary yqpal etetin bolady», - dedi T.Dúısenova.
Bul mindetterdi júzege asyrý úshin úsh negizgi baǵyt anyqtalǵan. Birinshiden, orta arnaıy nemese joǵary oqý oryndaryna túspeı qalǵan, bilimi joq 100 myńǵa jýyq jastarǵa erekshe kóńil bólinetin bolady. Olar tehnıkalyq jáne kásiptik bilim bazasynda alǵashqy jumys kásibin tegin alý múmkindigine ıe bolady.
«Ekinshiden, jastardy jumyspen qamtý sharalarynda kásibı baǵdar berý jumystaryn uıymdastyrý da qamtylady. 2017 jyly QR BǴM birlesip barlyq jalpy bilim beretin mektepterde, JOO-lar men kolledjderde kásibı baǵdar berý kabınetteri iske qosylady», - dedi mınıstr.
Úshinshiden, bilim mekemelerin támamdaǵan jastardy jumysqa ornalastyrýda týyndaıtyn kedergilerdiń biri - eńbek ótiliniń bolmaýyna baılanysty «alǵashqy jumys orny» máselesi. Ony sheshý úshin «jastar is-tájirıbesi» quraýyshy saqtalatyn bolady. Bul jas túlekterge memlekettiń qoldaýy esebinen jumys daǵdylaryn ıgerip, alǵashqy eńbek ótilin alýǵa múmkindik beredi, al bul bolashaqta turaqty jumys ornymen qamtylýyna jol ashady.
2016 jyldyń qorytyndylary boıynsha jastar arasyndaǵy jumyssyzdyq deńgeıi 2001 jylmen salystyrǵanda tórt eseden asa tómendegen – 16%-dan 3,9% deıin. Sonymen qatar, onyń deńgeıi elimiz boıynsha jumyssyzdyqtyń jalpy deńgeıinen birshama tómen. El turǵyndarynyń jalpy sanyna shaqqanda 14 jastan 29 jasqa deıingi jastardyń úlesi olardyń tórtten birin nemese 4,1 mln adamdy quraıdy.