Qazaqstandaǵy Kásipqoı boks federasııasynyń vıse-prezıdenti Vıktor Demıanenko Vesti.kz saıtyna bergen suhbatynda qazaqstandyq boksshy Qanat Islam men meksıkalyq álemniń burynǵy chempıony Saýl "Kanelo" Alvares arasynda bolýy múmkin jekpe-jek týraly óz pikirin bildirdi.
"Meniń oıymsha bul jaı sóz ǵana. Men Qanat Islamnyń meksıkalyq boksshymen qarsylas bolady degendi eshqandaı jerden kórmedim. Alaıda el arasynda sondaı sózder júrip jatyr. Soǵan qaraǵanda bir negiz bolýy múmkin. Jekpe-jek qazir bola qoımas, biraq soǵan alyp kele jatyr. Munyń ózi de jaqsy", - dedi Vıktor Demıanenko.
Boks mamanynyń aıtýynsha, jekpe-jekte boksshynyń daıyndyǵy men densaýlyǵy sheshýshi ról atqarady.
"Eger dál erteń Qanat Alvarespen shyǵatyn bolsa, birden jeńiledi dep aıta alamyn. Sebebi keshegi Qanat Islamnyń jekpe-jegin qarańyz. Ol aýyrǵandyqtan, jattyǵý jasaǵan joq. Onyń qolǵaptary durys bolmady degen jáı bos sóz. Sońǵy jekpe-jegi týraly sóz etip te qajeti joq. Ol qaıtyp jeńedi? Onyń soqqysy joıqyn emes. Onyń kásibı boksta ne kásibı sheberligi ne tájirıbıesi joq", - dedi ol.
Reseılik belgili kommentator Grıgorıı Stangrıt mamyr aıynda meksıkalyq Saýl "Kanelo" Alvares qazaqstandyq boksshy Qanat Islammen jekpe-jek ótkizýi múmkin degen qaýesetke qatysty pikir bildirdi. Ol Vesti.kz saıtyna bergen suhbatynda mundaı jekpe-jektiń ótýi múmkin emes ekenin aıtyp otyr.
"Nelikten ótýi múmkin emes? Mundaı jekpe-jekte bári de bolýy múmkin. Biraq, árıne, kúte turǵan abzal. Bul Chavestiń (Hýlıo Sezar Chaves - meksıkalyq boksshy) komandasynyń Alvareske túsirip otyrǵan qysymy da shyǵar", - dep atap ótti Stangrıt.
Eske salaıyq, keshe Fightnews.com basylymy Alvares - Islam jekpe-jegi ótýi múmkin degen bolatyn.