Ol kásibı músinshi emes. Biraq saz balshyqtan músin jasaý Qaısardyń bala kúnnen súıikti isi. Jaqynda ǵana ol belgili kásipqoı boksshy, orta salmaqtaǵy álem chempıony Gennadıı Golovkınniń músinin jasady. Aldymen ony saz balshyqtan oıyp, onan keıin plastmassadan quıǵan. Músinniń kúmis jáne altyn tústes boıaýlarmen boıalǵan eki túrin daıyndady.
– Músin stoldyń ústine qoıýǵa, kádesyı retinde jasaldy. Onyń bıiktigi 17 santımetr, salmaǵy 600 gramm. Úlkeıtýge de bolady, – deıdi Qaısar Nuǵymanov.
Kishkentaı ǵana músinnen bileginiń bulshyq eti oınap, jeńisine, jankúıerlerdiń senimin aqtaǵanyna marqaıǵan Genanyń júzin kóremiz.
– Golovkın asqan talantty sportshy. Ol jastarǵa, onyń ishinde qazaq jastaryna keremet úlgi. Gena ózin tek qazaqstandyqpen dep qana qoımaıdy, qazaqpyn deıdi. Suhbat bergende arasynda qazaq sózin qosyp qoıady, bul onyń eline degen qurmeti, – deıdi Qaısar.
Bul músinshi jigittiń birinshi jumysy emes. Ol buǵan deıin ál-Farabıdiń, Mýammar Kaddafıdiń, Bendjamın Franklınniń jáne taǵy basqalardyń músinin oıdy.
Qaısar qazir Qazaqstannyń Tuńǵysh Prezıdenti Nursultan Nazarbaevtyń músinin jasaýǵa kirisipti. Ol aldaǵy ýaqytta qazaq halqynyń qaıratker, kemeńger perzentteri músinderiniń jıyntyǵyn jasaýdy maqsat tutyp otyr.
– Halqymyzdyń tamasha tulǵalary kóp, olardy Elbasynan bastadym. Olardyń arasynda Reıhstagqa tý tikken Raqymjan Qoshqarbaevtyń músini mindetti túrde bolady. Ol músinderdi mektepterge taratýdy da armandaımyn. Mysaly, Ekinshi dúnıejúzilik soǵysta Reıhstagqa tuńǵysh tý tikken qazaq ekenin álem bilýi kerek, – dep tolǵanady Qaısar.
Názıra JÁRIMBETOVA,
«Egemen Qazaqstan»
QOSTANAI