Olımpıada chempıony Danııar Eleýsinov kásipqoı rıngte qaı salmaq dárejesinde óner kórsetetini belgili boldy.
Danııardyń ákesi ári jattyqtyrýshysy Marat Eleýsinovtiń aıtýynsha ázirge kelissózder ǵana júrgizilgen, al kelisimshartqa aqpan aıynda qol qoıylady. «Kásipqoı boksta bári basqasha. Sportshy bir ǵana kezdesýge daıyndalady. Bir táýlik ishinde salmaǵyn ólshep, qaıta qalpyna kelý jumystarymen aınalysady. Al áýesqoı boksta tańerteńgi ýaqytta bir ret ólshenseń, keshke taman jekpe-jek ótedi. Kásipqoıdyń taǵy bir erekshiligi – ólsheýden ótkennen keıin, ıaǵnı kezdesýdiń bastalýyna bir-eki kún qalǵanda jeti-segiz kılogramm «tastaý» úshin jattyǵý jumystarymen aınalysady. Al áýesqoıda bul múmkin emes jaǵdaı. Endi alda ne bolaryn ýaqyt kórsetedi», – dedi Danııardyń ákesi.
«Biz áli naqty bir salmaq dárejeni tańdaǵan joqpyz. Biraq 66 kg durys bolar dep topshylap otyrmyz. Munda sportshylar 80 kılodan 69 kıloǵa deıin salmaǵyn azaıtyp jatady. Sol úshin Danııardyń úırenshikti 69 kılosyn tańdamaımyz dep sheshtik. Jattyǵý kezinde ol 72 kıloda daıyndalady», – dedi Marat Eleýsinov. Promoýterlik kompanııany tańdaýda MJA Entertainment's-ke tústi. «Kelisimshart, sondaı-aq alǵashqy jekpe-jek jaıly ashyp aıta almaımyz. Bári resmı túrde júzege asqannan keıin habarlaıtyn bolamyz. Negizi Reseıden de, AQSh-tan da usynystar túsken. Biraq bul promoýterlik kompanııa bizge tıimdirek joldaryn usyndy», – dedi ol. Debıýttik kezdesýiniń aldynda oǵan óz stıline aıtarlyqtaı ózgerister engizý usynylyp otyr. «Danııar jańa kezeńge qadam basaıyn dep otyr. Kásipqoı stılge kóshýi úshin amerıkalyq jattyqtyrýshynyń qol astynda jattyǵady», – dedi. Bárimizge belgili Danııardyń aǵasy Dáýren de kásipqoı boksta óner kórsetedi. Ákesiniń aıtýynsha, ol da atalǵan promoýterlik kompanııamen jumys isteıdi.
«Dáýren burynǵy kompanııamen kelisimshartyn buzyp, MJA Entertainment's-ke qosyldy. Árıne, onyń usynysy Danııardikimen birdeı emes, biraq burynǵysynan jaqsyraq. Qansha degenmen, Danııar Olımpıada chempıony ǵoı», – dedi Marat Eleýsinov. Buǵan deıin Olımpıada chempıony Danııar Eleýsinovtiń kásipqoı boksqa aýysqandyǵy habarlanǵan. Sondaı-aq, jaqyn arada onyń qataryna asa aýyr salmaqta óner kórsetetin Ivan Dychko da qosylýy múmkin.