Qala syrtynda Qaınarbulaq degen saıajaı bar. Búginde Shymkentke kirip, qurqyltaıdyń uıasyndaı aýyl bolyp uıysyp otyr. Eki-úsh aı buryn sol aýyl turǵyndarynyń qatty janaıqaıy estildi. Belgisiz bireýler kóshege ornatylǵan sý eseptegish quraldarynyń qorabyn buzyp, qondyrǵyny alyp ketip otyrǵan. Sheship alǵany bar, kúsh qoldanyp julyp alǵany bar, jalǵanǵan turbalardan atqylaǵan sý kóshege jaıylyp ketken.
Sý eseptegish qondyrǵysy aqshaǵa kelgen, ishiń ashıdy. Al esepsiz aǵyp jatqan sýdyń shyǵyny qaınarbulaqtyqtarǵa teń bólinýi jáne múmkin. Árbir qondyrǵynyń janyna kúzetshi qoıatyndaı emes, sharbaq ishine ornatýǵa zań kótermeıdi. Qaınarbulaqtyqtar osylaı dabyl qaqqan. Árıne, urylardy erkinsitip qoıǵan polıseıler atyna da aýyr sózder aıtylǵan.
Bul joly da ury alystan kelmepti. Qarataý aýdandyq polıseıleriniń kún, tún qatyp izdeý salýy, syrttaı ańdýy jemisin berdi. Ustalǵan eki kúdiktiniń biri osy eseptegish quraldy ornatqan jumysshylardyń biri bolyp shyqty. «Dándegen qarsaq qulaǵymen in qazady» degendeı, qyrkúıek aıyndaǵy alǵashqy saparlarynan beri ustalmaı júrgenine masattanǵan ekeý sol ýaqyttan beri 2 mln teńgeniń eseptegish quraldaryn urlap úlgeripti.
Qolǵa túsken eki jas jigit Tóle bı aýdanynyń týmalary eken. Búginde olarǵa tergeý amaldary júrip jatyr. Ázirge kúdiktilerdiń 500-ge jýyq eseptegish quralyn urlaǵany anyqtaldy. Tún jamylǵan ekeý aýylǵa kelip montırovkamen qorapty maıystyryp ashyp, eseptegish quraldy alyp ketip otyrǵan. Urlanǵan quraldardy qara bazarda arzan baǵaǵa satyp, aqshany óz qajetterine jumsaǵan.
Tutastaı bir aýyldy qan qaqsatqan ekeý búginde Qylmystyq kodekstiń 188-baby boıynsha aıyptalyp, tergeý oqshaýlaǵyshyna jabyldy. Olar «urlyq túbi qorlyq» ekendigin endi túsingen syńaıly.
Baqtııar TAIJAN,
«Egemen Qazaqstan»
Ońtústik Qazaqstan oblysy