Referendýmda múmkindigi shekteýli azamattar erkin ári kedergisiz daýys bere alady. Máselen, kórý jáne estý qabileti buzylǵan jandar Braıl qarpindegi trafaretter, aýdıobıýlletender men sýrdoaýdarmaly aqparattyq materıaldardy qoldanady, dep habarlaıdy Egemen.kz.
Bul týraly Ortalyq saılaý komıssııasynyń janyndaǵy Múgedektegi bar adamdardyń saılaý quqyqtaryn qamtamasyz etý jónindegi jumys tobynyń otyrysynda aıtyldy.
Mańyzdysy – saılaý ýchaskeleri birinshi qabatta ornalasady. Sondaı-aq olar pandýstar, kireberistegi shaqyrý batyrmalary, avtokólikterge arnalǵan arnaıy turaq oryndary, taktıldi jolaqtar men arnaıy beıimdelgen kabınalarmen jabdyqtalady. Iаǵnı ýchaskelerde múgedektigi bar adamdarǵa arnalǵan buryshtar úlkeıtkishter, qulaqqaptar, ótkizilip jatqan naýqan týraly aqparattyq materıaldar, tirek-qımyl apparaty buzylǵan azamattardyń qoljetimdiligin eskere otyryp jabdyqtalǵan daýys berý kabınalarymen qamtamasyz etiledi.
Oǵan qosa kórý qabileti buzylǵan azamattarǵa arnalǵan aýdıoaqparat, estýinde ereksheligi bar otandastarymyzǵa sýrdoaýdarmasy bar beınematerıaldar, kreslo-arbamen júretinder úshin beıimdelip ornalastyrylǵan aqparattyq materıaldar qoljetimdi formatta súıemeldenedi. Referendým komıssııalary referendým týraly barlyq qajetti aqparatty qamtıtyn QR-kody bar shaqyrý qaǵazdaryn ázirleýde, sondaı-aq úılerdi aralaý barysynda azamattardyń arnaıy qyzmetterge muqtajdyǵy naqtylanatynyn aıtty.
«Bıýlletenge Braıl qarpimen trafaretter ázirlenedi jáne olar eldegi barlyq saılaý ýchaskelerinde usynylatyn bolady, bul format tolyqtaı kórmeıtin azamattar men nashar kóretin daýys berýshilerdiń qajettiligin qamtamasyz etedi, sondaı-aq ár daýys berý ýchaskesinde mindetti túrde aýdıobıýlleten qoljetimdi bolady», dedi Eńbek jáne halyqty áleýmettik qorǵaý vıse-mınıstri Vıktorııa Shegaı.
Jıynda barlyq deńgeıdegi referendým komıssııalarynyń músheleri úshin múgedektigi bar adamdardyń saılaý quqyqtaryn qamtamasyz etý máseleleri boıynsha beınekýrs uıymdastyrylǵany atap ótildi.
«Konstıtýsııa mátinin dybystaý jobasy – quqyqtyq aqparattyń qoljetimdiligin arttyrýǵa baǵyttalǵan tıimdi qadam. Aýdıonusqanyń elimizdegi 10 myńnan asa saılaý ýchaskesinde ornalastyrylatyny qýantady. Bul bastama, ásirese, múmkindigi shekteýli jandarǵa, egde jastaǵy azamattarǵa, kórý qabileti tómen nemese Braıl qarpin oqı almaıtyn adamdarǵa úlken qoldaý bolmaq. Osylaısha ár azamattyń sanaly túrde tańdaý jasaýyna jaǵdaı jasaıdy», dedi Prezıdent janyndaǵy Halyqtyń áleýmettik jaǵynan osal sanattarynyń quqyqtary jónindegi ýákil, Májilis depýtaty Kenjeǵul Seıtjan.
Jańa Konstıtýsııa mátinin Braıl qarpimen jazý usynyldy
Jumys tobynyń otyrysynda Aqtóbe jáne Pavlodar oblystarynyń ýchaskelerde elektrondyq úlkeıtkishter, estý qabileti tómen azamattarǵa arnalǵan ındýksııalyq ilmekter, jaryqtyq jáne dybystyq aqparattandyrǵyshtar, sondaı-aq Braıl qarpimen kórsetilgen ýchaske syzbalary túrinde ınnovasııalyq quraldarmen jabdyqtaý tájirıbesi týraly esepteri tyńdaldy. Qazirgi ýaqytta mundaı tájirıbelerdi basqa óńirlerde engizý tıisti jergilikti atqarýshy organdarmen birlesip, pysyqtalyp jatyr.
Azamattardyń 78%-dan astamy jańa Konstıtýsııany qoldaıdy