Kil myqtylar keledi

Bul kúnderi óz elimizde ótetin dodaǵa qatysý úshin Qazaqstannyń eń myqty 175 sportshysy úzdiksiz jattyǵýlar júrgizýde. Munan bólek qysqy Ýnıversıada oıyndaryna álemdik chempıonattarda top jarǵan sport sańlaqtary qatysatynyn eskersek, júldeler úshin talastar tartysty ótedi dep kútilýde. Aldaǵy kúnderi Almatyǵa keletin álem chempıondary arasynda 2014 jylǵy Olımpıada chempıony jáne short-trekten álemniń eki dúrkin chempıony Kım Alanga (Ońtústik Koreıa), tramplınnen sekirýden 2014 jylǵy Olımpıada oıyndarynyń qatysýshysy, Ýnıversıadanyń eki dúrkin chempıony Maksı­mochkın Mıhaıl (Reseı) men bıatlonnan 2012 jylǵy jasós­pirimder arasyndaǵy qysqy oıyndardyń chempıony Kım Cheolıýng (Ońtústik Koreıa) bar. Frıstaıldan 2015 jylǵy Ýnıversıada chempıony Kýche­rova Nıkol (Chehııa), Azııa oıyndarynyń kúmis júldegeri (2011 j.), 2012 jylǵy jasós­pirim­der arasyndaǵy álem chempıo­ny (1500m, 3000m ), 2013 jylǵy ýnıversıada chempıony Hvang Hıýn-San (Ońtústik Koreıa), bıatlonnan Álem kýbogy kezeńiniń eki dúrkin chempıony Batıst Jýtı (Fransııa) keledi. Tramplınnen sekirýden 2014 jylǵy jasóspirimder arasyndaǵy álem chempıony, 2013 jylǵy jasóspirimder arasyndaǵy álemniń komandalyq júldegeri Kshıshtof Bıegýn, taý-shańǵy sportynan 2016 jylǵy eki dúrkin chempıon (FIS Race) Bıalobrazskıı Domınık (Polsha), short-trekten 2014 jylǵy jasóspirimder arasyn­daǵy álem chempıony, 2015 jylǵy Ýnıversıada chempıony Chen Gýang (Qytaı) syndy sport maıtalmandaryn Almatydaǵy Ýnıversıadadan tabýǵa bolady. Sondaı-aq, Ýnıversıada-2017 jarystaryna mánerlep syrǵanaýdan eń myqty Reseı quramasy sapynda 2015 jylǵy Eýropa chempıony jáne álem chempıony Elızaveta Týktamysheva qatyspaq. Aty atalǵandarmen ıyq tires­tire alatyn óz myqtyla­rymyzdyń qatarynda Denıs Ten (mánerlep syrǵanaý), Iýlııa Galysheva (frıs­taıl), Pavel Kolmakov (frıstaıl), Janbota Aldabergenova (frıstaıl), Roman Krech (konkımen júgirý sporty), Stanıslav Palkın (konkımen júgirý sporty), Aıdar Bekjanov (short-trek), Abzal Ájǵalıev (short-trek), Nurbergen Jumaǵazıev (short-trek), Denıs Nıkısha (short-trek) syndy sańlaqtarǵa jankúıer bolamyz. Qoryta aıtqanda, Almatydaǵy Ýnıversıada qatysýshylary arasynda jasóspirimder arasyndaǵy Olımpıada oıyndarynyń 3 chempıony jáne 1 qola júldegeri, jasóspirimder arasyndaǵy álem chempıonatynyń 11 chempıony jáne 6 júldegeri, Qysqy ýnıver­sıadalardyń 6 chempıony, FIS qysqy starttarynyń jáne Álem kýbogy kezeńderiniń 20 chempıony jáne júldegeri bar. Mıra BAIBEK, «Egemen Qazaqstan»