Ýnıversıada jarystary kezinde jýrnalıster óz jumystaryn tıimdi atqarýy úshin drondardy paıdalaný múmkindigi týdy. Bul týraly Almatydaǵy HHVIII Dúnıejúzilik qysqy Ýnıversıadaǵa daıyndalý jáne ótkizý jónindegi dıreksııasy málimdep otyr. Osyǵan baılanysty qaýipsizdik departamentinde jarystardy, sondaı-aq, Ýnıversıadanyń ashylý jáne jabylý saltanattary kezinde BAQ-tyń ushqyshsyz ushatyn apparattardy (drondardy) qoldaný erejesi túsindirildi. Ýnıversıada is-sharalary men jarystaryn ótkizý kezinde sporttyq nysandarda pılotsyz apparattardyń qoldanylýy qatań retteledi. Drondardy qoldanýǵa múddeli BAQ osy jóninde Almaty qalasy ákimdiginen, Ulttyq qaýipsizdik komıtetinen jáne Memlekettik qorǵaý qyzmetinen ruqsat alýy tıis. Atalǵan organdarmen osy rásimdi maquldaǵan soń, Dıreksııa baspasóz qyzmetine drondardy qoldanylatynyn habarlaý qajet. Bul mekemelerdiń ruqsatyn alý úshin BAQ ókilderi drondar qandaı sport nysanynda, qaı kúni jáne qandaı ýaqytta qoldanylatyny jazylǵan resmı hatty daıyndaıdy. Hattyń qosymshasynda dronnyń búkil tehnıkalyq erekshelikteri men sıpattizimderi (kóterilý bıiktigi, aralap ushyp shyǵý radıýsy, batareıadan jumys jasaý ýaqyty jáne t.b.) kórsetiledi. Sondaı-aq, dronnyń jumysyn basqaratyn tulǵanyń qujattaǵy málimetteri usynylýy tıis. Aınash ESALI, «Egemen Qazaqstan» ALMATY