Búgingi kúnniń ózekti máseleleriniń biri turǵyndardyń jumyspen qamtylýyna jaǵdaı týǵyzý jáne kásipkerliktiń kókjıegin kóterý ekeni belgili. Bul baǵytta respýblıkamyzda buǵan deıin «Jumyspen qamtýdyń jol kartasy-2020» baǵdarlamasy belgilenip, osy sheńberde kóptegen jobalar júzege asty. Atalǵan baǵdarlama áli de óz jalǵasyn taýyp keledi. Munda eń aldymen ýaqytsha jumys oryndaryn qurýǵa basymdyq berilgen bolatyn. Ýaqytshanyń aty ýaqytsha. Men bul jerde ýaqytsha jumys jasap júrmin degen oı adamdarǵa psıhologııalyq turǵydan qolaısyzdaý áser etedi. О́ıtkeni, mundaı jaǵdaıda olar kóńilin túbegeıli ornyqtyra almaıdy.
Osy oraıda bıylǵy jyldan bastap elimizde turaqty jumys oryndaryn ashýǵa basa kóńil bólinip otyrǵany úlken mereı. Respýblıka Úkimetiniń 2016 jyldyń 29 jeltoqsany kúni qabyldaǵan «Nátıjeli jumyspen qamtýdy jáne jappaı kásipkerlikti damytýdyń 2017-2021 jyldarǵa arnalǵan baǵdarlamasy» osy maqsatty kózdeıdi.
Oral gaz, munaı jáne salalyq tehnologııalar kolledjinde osy máselege oraı arnaıy keńes ótkizildi. Oǵan baǵdarlamanyń birinshi baǵytyna tolyq ári jan-jaqty túsinik berý jáne sala mamandarynyń saýaldaryna jaýaptar qaıtarý úshin Bilim jáne ǵylym mınıstrligi Tehnıkalyq jáne kásiptik bilim departamentiniń bas sarapshysy Baqytjan Bıekova arnaıy kelipti. Onyń aıtýynsha, nátıjeli jumyspen qamtýǵa jáne jappaı kásipkerlikti damytýǵa jańa baǵdarlamanyń tıgizetin septigi mol. Sonymen birge, onyń aıasynda tabysy tómen qazaqstandyqtarǵa jeke isi men kásibin ashý úshin memlekettik qoldaýlar jasalady.
Jańa baǵdarlama respýblıka Prezıdenti N.Nazarbaevtyń tapsyrmasyna saı ázirlengen dep atap kórsetti bas sarapshy. Onyń basty maqsaty – óz ataýynan kórinip turǵandaı, azamattardy nátıjeli jumyspen qamtýǵa jáne turǵyndardyń tabystaryn tolyqtyrýǵa jaǵdaı týǵyzý. Atalǵan joba ásirese aýyl turǵyndarynyń eleýli bóligine kásipkerliktiń alǵashqy qadamdaryn ornyqtyrýǵa sondaı-aq, bıznes bastamalaryn júzege asyrýǵa múmkindik beredi. Sonymen birge, jastardyń naryq suranysyna saı mamandyqtardy tegin ıgerýine de jol ashady, dedi ol odan ári.
Túıip aıtqanda, nátıjeli jumyspen qamtý jáne jappaı kásipkerlikti damytý baǵdarlamasy batysqazaqstandyqtarǵa qandaı shapaǵatyn tıgizedi degen oıǵa taban tiregimiz keledi. Bul rette aldyn ala ázirlengen keıbir derekterdi oqyrmandar nazaryna bere ketkenniń artyqshylyǵy bola qoımas. Iаǵnı, oǵan Oral óńiri boıynsha bes jyl ishinde 4000 adam tartylmaq. Munyń ózi ár jyl saıyn 800 adam turaqty jumys ornyn tabady degen sóz. Sonymen birge jańa baǵdarlama el azamattarynyń, sonyń ishinde, olardyń keıingi tolqyny men jastardyń qysqa merzimdi kásiptik bilim alýyna da negiz qalaıdy. Soǵan sáıkes Aqjaıyq aımaǵynan 5000-ǵa jýyq adam atalǵan kýrsqa qabyldanady dep kútilýde. Buǵan birinshi kezekte UBT tapsyra almaǵan mektep túlekteri men turmysy tómen otbasynan shyqqan balalardy oqytý kózdelgen. Olarǵa birinshi jáne ekinshi mamandyqty tegin alyp shyǵý múmkindigi berilmek.
Temir QUSAIYN,
«Egemen Qazaqstan»
ORAL