Ortalyq kommýnıkasııalar qyzmetinde Antarktıdaǵa barǵan «Táýelsizdik polıýsi» ǵylymı-zertteý ekspedısııasynyń qorytyndysy týraly baspasóz máslıhaty ótti.
Buǵan deıin habarlanǵanyndaı, ekspedısııa 42 kúnge jalǵasqan. Onda ekspedısııa músheleri Antarktıdanyń saryshunaq aıazynda ǵylymı-zertteýler júrgizip qaıtqan. Ekspedısııaǵa komanda kapıtany Maǵjan Saǵymbaev, sportshylar Iýrıı Iýshın, Ilııas Ǵalymbekov, ǵylymı qyzmetkerler Dáýlet Sháripov, Arman Baımuhamedov pen komandanyń jalǵyz arýy – Álııa Ernazarova qatysypty. Olar Antarktıdanyń Vınson shyńyna shyǵyp, Ońtústik polıýske shańǵymen jetken.
Brıfıngte ǵylymı sapar týraly «Qazaq geografııa qoǵamy» qoǵamdyq birlestiginiń tóralqa tóraǵasy Tólegen Tastanbekov baıandady. Ol ekspedısııanyń máni men mańyzy týraly keńinen aıtyp berdi. «Jobanyń barlyq úsh kezeńi sátti ótti. Bizdiń qyz-jigitter Vınson shyńyna shyǵyp, shańǵy ekspedısııasy men ǵylymı-zertteýlerdi júrgizip qaıtty. Elimizdiń tarıhynda alǵash ret Táýelsizdik kúni Qazaqstannyń Memlekettik týy Antarktıdanyń eń bıik núktesine kóterildi. Ekspedısııaǵa qatysýshylar otandastarymyzǵa eki ret syı jasady. Iаǵnı, olar 16 jeltoqsanda Vınson shyńynan elimizdi Táýelsizdik kúnimen quttyqtap, 31 jeltoqsanda Ońtústik polıýsten jańa jyl qarsańynda quttyqtaý sózderin joldady. Ekspedısııa kóptegen adamdardyń atsalysýymen júzege asty», – dedi T.Tastanbekov.
Osyǵan oraı, qoǵamdyq birlestiktiń tóralqa tóraǵasy shyn júrekten «Qazaq geografııa qoǵamy» qamqorshylar keńesiniń tóraǵasy Kárim Másimovke, basqarma keńesiniń tóraǵasy Qanat Baıǵarınge, QHA Tóraǵasynyń orynbasary Eraly Toǵjanovqa, Aqparat jáne kommýnıkasııalar mınıstri Dáýren Abaevqa, «Báıterek» holdınginiń basqarma tóraǵasy Erbolat Dosaevqa, Nazarbaev Ýnıversıtettiń prezıdenti Shıgeo Katsýǵa, ál-Farabı atyndaǵy QazUÝ-diń rektory Ǵalymqaıyr Mutanovqa, S.Asfendııarov atyndaǵy QazUMÝ-diń birinshi prorektory Nurgúl Hamzınaǵa, sonymen birge, jýrnalıster, blogerler men barsha Qazaqstan halqyna ózderine senim artyp, qoldaý kórsetkenderi úshin alǵysyn bildirdi. «Shyn júrekten sizderge úlken rahmet!», – dedi olar.
Atletter Maǵjan Saǵymbaev, Iýrıı Iýshın, Ilııas Ǵalymbekov pen dáriger Dáýlet Sháripov qazaqstandyq shańǵy ekspedısııasynyń Ońtústik polıýske alǵash ret barǵan músheleri bolyp otyr. Olar 11 kúnde 217 shaqyrymdy muzdyń ústimen júrip ótti. Ekspedısııa tobynyń jetekshisi Maǵjan Saǵymbaevtyń sózine qaraǵanda, ózi ekspedısııa kapıtany bolǵanyna óte qýanyshty eken. «Bul men úshin úlken qurmet, sol sebepten bizdiń komandamyzdyń árbir múshesi 100 paıyzǵa jumys istedi. Árıne, jolda qıyn jaǵdaılar da boldy. Degenmen, biz qandaı qıyndyq bolsa da onyń bárin jeńe bildik. Bizge qoldaý kórsetip, senim artqan barsha qazaqstandyqtarǵa alǵysymdy bildiremin», – dedi ol.
Ekspedısııanyń ǵylymı bólimine bıologııa salasynda jáne Antarktıdanyń tótenshe jaǵdaıynda adam fızıologııasyna áser beretin derekterdi taldaǵan jas qazaqstandyq ǵalymdardyń zertteýleri endi. Aldaǵy kezde sonyń nátıjesi boıynsha dóńgelek ústel men sheberlik-sabaqtar ótkiziledi eken. Osyǵan baılanysty ekspedısııanyń ǵylymı qyzmetkeri Arman Baımuhamedov jaqyn arada sapardyń qorytyndysy jan-jaqty zerttelip, ǵylymı jumystardyń nátıjesi shyǵatynyn, oǵan mamandar taldaý jasaıtynyn atap ótti.
Dastan KENJALIN,
«Egemen Qazaqstan»