QR Aqparat jáne kommýnıkasııalar vıse-mınıstri Alan Ájibaevtyń aıtýynsha, aldaǵy ýaqytta teledıdardaǵy jarnamanyń ýaqytyn bir saǵatqa deıin azaıtý josparlanyp otyr, dep habarlaıdy QazAqparat.
«Mınıstrlik múmkindigi shekteýli azamattardyń quqyqtaryn qorǵaý aıasynda telearnalarǵa praım-taım kezinde jańalyqtardyń bireýin sýrdoaýdarmamen nemese sýbtıtrmen berýdi usynyp otyr», - dedi Ájibaev aqparat jáne kommýnıkasııalar zańnamasyna ózgeristerdi engizýge arnalǵan qoǵamdyq talqylaýda.
Sondaı-aq jarnamanyń ýaqytyn birte-birte azaıtý josparlanǵan. Sóıtip, telearnalar jarnamany bir saǵatqa deıin shekteıdi.
«Osynyń arqasynda efırdiń ýaqytyn jarnamadan tabys tabý úshin paıdalanýdy toqtatyp, halyqtyń narazylyǵyn azaıtýǵa bolady», - deıdi vıse-mınıstr.
Al memlekettik organdar men qoǵamdyq oryndarda tek qazaqstandyq arnalardy ǵana qoıýdy mindetteý týraly usynys bar. Budan bólek, mektep oqýshylaryn jaǵymsyz aqparattan barynsha qorǵaý maqsatynda «balanyń jas ereksheligine saı keletin aqparat» degen túsinik engizilip otyr. Osynyń nátıjesinde mektepterde qaýipsiz ǵalamtor jelisin uıymdastyrý josparlanǵan. Al halyqtyń aqparattyq mádenıetin kóterý úshin buqaralyq aqparat quraldarynyń patrıotızm, naqtylyq, etıkany saqtaý jáne taǵy basqa prınsıpterin engizý kózdelgen.
Jalpy, búginde aqparat jáne kommýnıkasııalar máseleleri boıynsha ózgerister men tolyqtyrýlar engizý týraly zańǵa qatysty 200-ge jýyq usynys bar. Vıse-mınıstr Ájibaevtyń sózine qaraǵanda, atalǵan zań jobasy memlekettik jáne jergilikti atqarýshy organdardyń qaraýyna jiberildi. Budan bólek, zańgerlik, ekonomıkalyq jáne lıngvıstıkalyq saraptama bar. Osydan keıin ony taǵy da qoǵamdyq uıymdardyń talqylaýyna salý josparlanyp otyr. «Sóıtip, barlyq jumysty sáýir aıynyń sońyna deıin aıaqtap, mamyrda ony Májiliske engizýge tyrysamyz», -dep atap kórsetti Ájibaev.