«Tabıǵat» ekologııalyq odaǵynyń tóraǵasy, Qazaqstan Respýblıkasy prezıdenttigine kandıdat Mels Hamzauly Eleýsizovtiń Ile-Alataý ulttyq parki ujymymen, parktiń «Aqsaı» orman sharýashylyǵy» bólimshesi qyzmetkerlerimen, sondaı-aq jaqyn jatqan Tastybulaq jáne Kamenka aýyldarynyń turǵyndarymen kezdesýi maqsattar men múddeleri bir adamdardyń áńgimesindeı boldy.
Áńgime arqaýy Ulttyq parktiń taǵdyry, ony saqtap qana qalý emes, jaǵdaıyn jaqsartýǵa arnaldy. Prezıdenttikke kandıdat pen osynda tabıǵatqa qamqorlyq jasaý jóninde sóz qozǵaǵan saılaýshylardyń oı-pikirleri negizinen bir jerden shyǵyp jatty. Ekologııa máselesine kez kelgen adamnyń qatysy bolýǵa tıis, ony jaqsartýǵa árkim óz úlesin qosýǵa tıis. Tabıǵat-ana sonda óz ıgiligin adamnan da aıamaıdy.
Búgingi kezdesýge kelgenderdiń kópshiligi sol tabıǵat qorǵaý isine qatysty bolsa da, olar saıasattyń ózekti máselelerin de nazardan tys qaldyrmady. Ásirese, sot júıesin jaqsartýǵa baılanysty biraz pikir aıtyldy. Sot ádil bolmaı, jemqorlyqty joıa almaımyz, dedi kópshilik. Al onyń ádildigine jetýdiń bir joly – olardy halyq saılaýy kerek, degen pikirdi bas ekolog ortaǵa saldy. Jınalǵandar prezıdenttikke kandıdattyń baǵyt-baǵdaryn da keń sóz etti. Qazirgi Prezıdenttiń keńesshisi, saıasatker Ermuhamet Ertisbaevtyń Eleýsizov pen Qasymovtar bılikke oppozısııada bolady degen pikirin alǵa tosa otyryp, saılaýshylar bul jaıynda halyq ekologynyń óz aýzynan áńgime estigisi kelgenin bildirdi. Men qashanda ortada bolǵandy qalaımyn, dedi Eleýsizov. Al tabıǵat qorǵaý – barlyǵymyzdyń ortaq isimiz. Munda barlyǵymyz da aldyńǵy shepte bolýǵa mindettimiz.
Dál osyndaı mindetti osy kezde Semeı qalasynda prezıdenttikke kandıdat Mels Eleýsizovtiń jaqtastary atqaryp jatty. Bastamashy top qaladaǵy qarttar úıin qamqorlyqqa alyp, onda senbilik ótkizdi.
Senbilikti uıymdastyrýshylar bul isti qarttar úıinen bastaǵandaryna aıryqsha mán beredi. Tabıǵatqa qamqorlyq – eń aldymen adamǵa qamqorlyq. Osy múdde qashanda úılesip jatýǵa tıis. Balabaqshalar da, mektepter de osyndaı qamqorlyqtyń aıasyna enýge tıis.
Rasynda da, sol senbilikten keıin qarttar úıi jańa keıipke kóshti. Úıdiń aınalasy tolyq tazartylǵannan keıin, aǵashtar aqtalyp, ashyq jerlerge jańa aǵash kóshetteri otyrǵyzyldy. Bul ózi kúni erteń aǵashtar japyraq jarǵan kezde tipti qulpyryp ketetin bolady. Qarttardyń jasyl jelek arasynda demalýynyń, árıne, rahaty kóbirek.
Semeılik tabıǵat qorǵaýshylardyń pikirinshe, Mels Eleýsizovtiń «jasyldar» qozǵalysyn elimizdiń barlyq jerinde uıymdastyrsaq, odan tabıǵatymyz ǵana jańaryp qoımaı, adam sanasyna da ózgeris enedi. Adamdar qaıyrymdyraq bola túsedi.
Tabıǵatqa qamqorlyq barlyq jerde, ár úıdiń aýlasynan bastalsa, onyń aýqymy da keńı túspek.
Mamadııar JAQYP.
Almaty oblysy.