Italııadaǵy Gran-Sasso taýynyń mańynda Rigopiano qonaq úıi qar kóshkini astynda qaldy. Aldyn ala málimetter boıynsha, onda 30 adam bolǵan, dep habarlady VVS.
Qutqarýshylar qar astynan úsh adamdy alyp shyqqan. Basylymnyń habarlaýynsha, birneshe adam qaıtys bolyp, 22 adam is-tússiz joǵalǵan. Italııalyq BAQ ókilderi úsh qabatty qonaq úı sársenbi kúni keshke qar kóshkininiń astynda qalǵanyn aıtady. Alaıda, qalyń qar jaýyp, joldar jabylyp qalǵandyqtan, qutqarýshylar tabıǵı apat ornyna tek beısenbi kúni jetken. Qutqarý qyzmetiniń basshysy Antonıo Krochetta jýrnalısterge: "Qaza tapqandar kóp", dedi. Onyń aıtýynsha, qatty qar kóshkininen qonaq úıdiń tóbesi ortasyna qulaǵan. Apat ornynda qardyń qalyńdyǵy bes metrge jetedi. Bul da adamdardy qutqarý operasııasyna birshama kedergi keltirýde. "Qonaq úıge tikushaqpen qutqarýshylar kelip jatyr. Qazir qardy qazý jumystaryn júrgizýdemiz", deıdi órt sóndirý qyzmetiniń resmı ókili Lýka Karı. Mamandardyń boljaýyna qaraǵanda, qar kóshkininiń týýyna Italııada bolǵan jer silkinisi áser etken. Esterińizge sala ketsek, Italııanyń Lasıo, Abrýsso men Mark oblystarynda bir kúnde magnıtýdasy besten asatyn tórt jer silkinisi bolǵan edi.