Táýelsizdigimizdiń tuǵyry, eldigimizdiń aıbary, halqymyzdyń aıbynyna aınalǵan arý Astana taǵy da aıdy aspanǵa shyǵaryp, jarty álemdi jaılaǵan keńistiktegi qalalardyń jeńimpazy atandy. Halyqaralyq Astanalar jáne iri qalalar assambleıasynyń bastamasymen ótkizilgen «TMD jáne EýrAzEQ-tyń úzdik qalasy» atty III halyqaralyq qalalyq tájirıbeler baıqaý-konkýrsynda Astana qalasy 81 qalanyń ishinen top jaryp, úzdik shyqty. Elordamyz 2030 jyldarǵa deıingi damýdyń turaqty strategııalyq josparyn belgileý jáne júzege asyrý, buqaralyq deneshynyqtyrý jáne sportty damytýǵa jan-jaqty jaǵdaı jasaý, kemtar adamdardyń turmysy úshin jaqsy jaǵdaı jasaý jáne áleýmettik qoldaý júıesin uıymdastyrý, tutynýshylardyń quqyn qorǵaý jónindegi qoǵamdyq jáne mýnısıpaldyq uıymdar qurý, qala aýmaǵyndaǵy óndiristik nysandarǵa ekologııalyq baqylaý jasaý sııaqty nomınasııalar boıynsha jeńimpaz dep tanylyp, eń joǵarǵy dıplommen marapattaldy. Astana turǵyndaryn qalamyzdyń osy bir zor jetistigimen quttyqtaı otyryp, elordanyń eńsesiniń bıikteı berýine sáttilik tileımiz!
(Osy qýanyshty oqıǵaǵa baılanysty Astana qalasyna arnalǵan arnaýly bet gazetimizdiń taıaýdaǵy nómirinde jaryq kóretin bolady).
Jylqybaı JAǴYPARULY.