Zań erejelerin túsindirdi

Parlament Senatynyń depýtaty Darhan Káletaev Astana qalasyndaǵy Qylmystyq atqarý júıesi departamentiniń ES-166/10 mekemesinde boldy, dep habarlady Senattyń baspasóz qyzmeti. Senator túzeý mekemeleriniń jumy­symen tanysty, mekeme qyzmetker­lerimen jáne sottalǵandarmen kezdesý ótkizip, raqymshylyq jáne probasııa týraly zańdardyń negizgi erejelerin túsindirý jóninde áńgime boldy. «Memleket basshysy atap ótkendeı, raqymshylyq jasaý – ol memleket tarapynan jasalǵan izgilikti is. Kim qatelesti, kim jańyldy, kim zańdy buzdy, solarǵa óz jol­daryn taza paraqtan bastaýǵa múmkindik berdik. Bizdiń otandastarymyzǵa degen meıirim, úmit jáne keshirim sharasy qoǵamymyzdy saýyq­tyrýǵa múmkindik beredi», – dep atap ótti. D.Káletaev sottalǵandarmen kezdesý kezinde. «Probasııa týraly» Zańnyń erejelerin túsindire kelip, senator probasııanyń eki úlgisiniń engizilýine baılanysty elimizde esepte turǵan adamdardyń minez-qulqyn baqy­laýdyń sapalyq turǵydaǵy jańa júıe­si men túri jasalyp jatqanyn atap ótti. Ol ja­zany oryndaýdyń bizdegi júıesin 1955 jyly BUU Kongresi qabyldaǵan «Nel­son Man­dela erejeleri» dep atalatyn oqshaý­lan­­ǵan­­darǵa qatysty eń az standarttar ta­lap­taryna sáıkes keltirýge múmkindik beredi. Senator odan basqa, mekeme aýmaǵyndaǵy turǵyn jaı ǵımarattarynda, ashana men orta mektepte, sanıtarlyq bólimde bol­dy, óndiris ýchaskesimen tanysyp, sottal­ǵan­dardy jeke máseleleri boıynsha  qabyldady.