Parlament Senaty Halyqaralyq qatynastar, qorǵanys jáne qaýipsizdik komıtetiniń tóraıymy, Qazaqstan Jastar kongresi keńesiniń tóraǵasy Darıǵa Nazarbaevanyń jetekshiligimen Jastar kongresiniń aldaǵy qyzmeti týraly keńes boldy, dep habarlady Parlament Senatynyń baspasóz qyzmeti.
D.Nazarbaeva jastar saıasatyn iske asyrýdaǵy jetistikterdi atap óte kelip, aýyl-aımaqtaǵy jáne áleýmettik ahýaly tómen jastarǵa arnalǵan jańa múmkindikter ashýdyń qajettigine toqtaldy. Senator, sondaı-aq, memleket júzege asyratyn mańyzdy áleýmettik baǵdarlamalar men jobalar týraly jastardyń habardar bolý deńgeıin arttyrý jaıynda tapsyrma berdi. «Jastardyń ózin ózi tanytý úshin jaǵdaı týǵyzyp, «áleýmettik lıftiler» jasap, olardy daǵdarys jaǵdaıynda ómir súrýge úıretý kerek», – dedi D.Nazarbaeva.
Keńes barysynda uıymnyń 2016 jylǵy jumysy jáne áskerı-patrıottyq qozǵalysty, mektep sportyn, jastar týrızmin damytýdaǵy tujyrymdamalyq usynystar, sondaı-aq, Qazaqstan Jastar kongresiniń mereıtoılyq jylyn merekeleý baǵdarlamasy talqylandy. D.Nazarbaevanyń pikirinshe, memlekettik buqaralyq aqparat quraldaryndaǵy jastar qyzmetin aqparattyq turǵyda jarııa etýdi kúsheıtý qajet. «Jastardy memleket iske asyratyn sharalar týraly habardar etý deńgeıin arttyrýmen qatar, áriptester áreketiniń tanymaldyǵyn arttyrý úshin aqparattyq arnalardy paıdalaný kerek», – dep atap ótti senator.
Keńeske Parlament depýtattary, jastar saıasaty salasyna jetekshilik etetin mekemelerdiń basshylary, Dúnıejúzilik bank jobasynyń ókilderi, úkimettik emes sektordy damytý ınstıtýttarynyń basshylary, áskerı-patrıottyq tárbıe men mektep sportyn damytý salasyndaǵy Qazaqstan Jastar kongresiniń áriptesteri, jastar uıymdarynyń kóshbasshylary qatysty.
Dúnıejúzilik banktiń «Jastar korpýsyn damytý» jobasyna erekshe nazar aýdaryldy. Osyǵan baılanysty sharaǵa 2017 jylǵy qadamdar men tetikterdi iske asyrýdyń alǵashqy jobalary iske asyrylatyn Almaty, Qaraǵandy, Pavlodar, Ońtústik Qazaqstan oblystary ákimderiniń orynbasarlary da qatysty.