Úkimet otyrysynda Premer-Mınıstrdiń birinshi orynbasary Asqar Mamın Reseı Federasııasynyń qazaqstandyq kómirdi satyp alý kólemin azaıtatyndyǵyn, degenmen, Ekibastuz kómirin kórshi Qytaı eline satýǵa bolatyndyǵyn jetkizdi.
"Árıne, bizge osy salada bolyp jatqan ózgeristerdi eskerip otyrý qajet. Máselen, kórshi Reseı 2030 jylǵa deıin kómir óndirisin 400 mln. tonnadan 500 mln.-ǵa deıin arttyrýdy josparlap otyr. Oǵan qosa, Ekibastuz kómirin óz kómirimen almastyramyz dep jatyr. Osynyń bári qazaqstandyq shıkizattyń eksportyn qysqartýy ábden múmkin. Sondyqtan bizge jańa naryqtardy izdeý kerek. Kóliktik-logıstıka jaǵyn da aldyn ala oılastyryp qoıǵan jón. Osy oraıda, Qytaıdyń kómir ımportyn 200 mln. tonnaǵa deıin arttyryp otyrǵanyn atap ótý kerek. Osyny zerdelep, shekara jaqyn aımaqtardan kómir jetkizý máselesin qarastyrýǵa bolady", - dedi Mamın.
Degenmen, Úkimet basshysy Baqytjan Saǵyntaev aldymen ekologııalyq máselelerdi eskerý kerektigin jetkizdi.
"Ekibastuzdy bárimiz jaqsy bilemiz. Ol jaqta bolǵandar ekologııasyn da kórgen. Osy oraıda naqty bir sharalardy, sonyń ishinde kómir xımııasyn damytýdy qolǵa alǵan durys. Kómir plasttarynan metandy alý asa mańyzdy. Sol úshin búgin mamandardy shaqyryp otyrmyz. Oladyń pikirin tyńdaıyq, tájirıbesin zerdeleıik dep, arnaıy shaqyrdyq. Sebebi siz, Asqar Uzaqbaıuly, jana Qytaıdyń kómir ımportyn ulǵaıtqany jaıynda aıtyp otyrsyz ǵoı. Meniń bilýimshe, Qytaı úkimeti 2020 jylǵa deıin kómir óndirisin 500 mln. tonnaǵa deıin azaıtýdy josparlap otyr. Olar ekologııaǵa baılanysty osyndaı sharalardy qolǵa aldy. Sondyqtan osyny áli de zerdeleý kerek", - dep atap kórsetti Saǵyntaev.
Premer-Mınıstr máselelerdi talqylaý qorytyndysy boıynsha óziniń birinshi orynbasary A. Mamınge atalǵan máselelerdi sheshý boıynsha usynystar ázirlep, bul jumysty jalpy úılestirýdi júzege asyrýdy tapsyrdy. Sondaı-aq B. Saǵyntaev kómir óndiriletin oryndarda ekologııalyq qaýipsizdikti qamtamasyz etý máselesine nazar aýdarý qajettigin atap ótti.