Májilistegi «Nur Otan» partııasy fraksııasy áleýmettik ınfraqurylymdy damytýdyń 2015-2019 jyldarǵa arnalǵan «Nurly jol» memlekettik baǵdarlamasyn iske asyrýǵa bıýdjetten jáne Ulttyq qordan bólinetin qarajattyń nysanaly jáne tıimdi paıdalanylýyn baqylaý jónindegi komıssııanyń otyrysy boldy.
Ony komıssııa jetekshisi Irına Aronova júrgizip otyrdy. Negizgi baıandamany Bilim jáne ǵylym vıse-mınıstri Elmıra Sýhanberdıeva jasap, bilim berý nysandarynyń qurylysy boıynsha aıtyp berdi. «Nurly jol» baǵdarlamasy boıynsha 2015-2017 jyldar aralyǵynda 57,4 mlrd teńgege 110 bilim berý nysanynyń qurylysyn júrgizý qarastyrylǵan eken. Olardyń – 91-i mektep, 19-y – balabaqsha. 2016 jyldyń qorytyndysy boıynsha 52 bilim berý nysany paıdalanýǵa berilgen, sonyń ishinde 35-i – mektep, 17-si balabaqsha bolǵan. 27 mektep úsh aýysymdy qysqartýǵa, 8-i apatty jaǵdaıdaǵylardyń ornyna salynǵan.
2017 jylǵa 56 mektep pen 2 balabaqsha salý josparlanǵan. 2017 jyldyń 1 qańtaryna deıingi jaǵdaı boıynsha baǵdarlamany tolyqtaı iske asyrý úshin jergilikti atqarýshy organdarǵa 57 mlrd 371,8 mln teńge aýdarylǵan. Bul – barlyq bólingen qarajattyń 99,9 paıyzy degen sóz. Qarajattardyń ıgerilmeýi Atyraý jáne Shyǵys Qazaqstan oblystarynda oryn alǵan.
Baıandamashyǵa qurylysy bir jyldan kelesi jylǵa sozylǵan nysandar týraly suraqtar kóp qoıyldy. Máselen, Irına Aronova ondaı qurylystardyń Almaty oblysynda tym kóp ekenine nazar aýdardy. Barlyq 15 mekteptiń 5-ýi 31 qańtarǵa berilýge tıisti bolǵan. «Alaıda, olardyń ashylýynyń aýyly alys ekenin biz jýyrda óz kózimizben kórip keldik. Osyndaı nysandardy qalaı qadaǵalaısyzdar?» – dep surady depýtat. «Biz ony naýryz aıynda tolyqtaı qabyldap, sizderge fotosýretterin kórsetetin bolamyz», – dedi mınıstrliktiń ókili.
Komıssııa jumysynyń qorytyndysy boıynsha Úkimetke usynystar jasalatyn boldy.
Jaqsybaı SAMRAT,
«Egemen Qazaqstan»