Almaty qalasynda Mádenıet jáne aqparat mınıstrliginiń qoldaýymen erekshe halyqaralyq mádenı joba – «Tańbaly: Babalar kody» kórmesi uıymdastyrylady. Is-shara 2 sáýir kúni saǵat 15:00-de Ábilhan Qasteev atyndaǵy Ulttyq óner mýzeıinde ótpek, dep habarlaıdy Egemen.kz.
Kórme «Tańbaly» memlekettik tarıhı-mádenı jáne tabıǵı mýzeı-qoryǵy men fotosýretshi Vladıslav Kımniń birlesken jobasy retinde usynylyp otyr. Ekspozısııa tańbaly petroglıfterdi zamanaýı óner men sıfrlyq tehnologııalar arqyly jańa qyrynan tanystyrýdy kózdeıdi. Negizgi qaǵıda – aýtenttilik pen tarıhı túpnusqany saqtaý.
Kórme mazmuny tereń sımvoldyq mánge ıe. Ejelgi petroglıfter «babalar kody» retinde qarastyrylyp, olar arqyly kóne dúnıetanym, mıfologııa, tabıǵat pen ǵarysh týraly bilimniń kórinisi usynylady. Immersıvti mýltımedııalyq sheshimder kelýshilerge kıeli keńistiktiń atmosferasyn sezinýge múmkindik beredi.
Kórmeniń basty maqsaty – Tańbaly petroglıfterin tiri mádenı mura retinde keńinen nasıhattaý jáne olardy zamanaýı óner quraldary arqyly keń aýdıtorııaǵa qoljetimdi etý. Osy arqyly tarıhı-mádenı qundylyqtardy saqtaý men dáripteý isi jańa deńgeıge kóterilmek.
Ekspozısııada jartas sýretteriniń fotokartınalary, petroglıfter negizinde jasalǵan art-obektiler jáne jasandy ıntellekt (JI) qoldanylǵan mýltımedııalyq tehnologııalar usynylady. Sonymen qatar kelýshilerge kórme katalogy men petroglıfter negizinde ázirlengen avtorlyq sývenırler qoljetimdi bolady.
Almatyda Bolat Muhamedıev shyǵarmashylyǵyna arnalǵan kórme ashyldy
Kórme qonaqtarynyń qatarynda Almatydaǵy IýNESKO aımaqtyq ókilderi, sheteldik jartas óneri boıynsha jetekshi mamandar, Búkilálemdik mura obektileriniń basshylary, sondaı-aq otandyq arheologtar, tarıhshylar, etnologtar men mádenıettanýshylar bar. Budan bólek, mýzeı salasynyń mamandary, bilim berý uıymdarynyń ókilderi jáne bıznes qaýymdastyǵy da qatysady.
Kórme aıasynda «Jartas sýretterin vıtrınasyz usyný: jartas ónerin tanystyrý jáne ony keńinen nasıhattaýdyń zamanaýı tásilderi» atty halyqaralyq ǵylymı-tájirıbelik konferensııa ótedi. Bul alańda mamandar mádenı murany saqtaý men tanystyrýdyń jańa ádisterin talqylaıdy.
Atalǵan kórme men konferensııa «Tańbaly» mýzeı-qoryǵyn jartas ónerin zertteý jáne nasıhattaý jónindegi álemdik deńgeıdegi ortalyq retinde nyǵaıtýǵa yqpal etedi. Sonymen qatar mádenı murany saqtaý boıynsha turaqty tájirıbelerdi qalyptastyrýǵa jol ashady.
Almatyda qazaqy tazy ıtterdiń kórmesi ótti