Qazaqstanda memlekettik qoldaý sharalarynyń nátıjesinde sý únemdeý tehnologııalaryn engizý aıtarlyqtaı jedeldep, sońǵy jyldary bul baǵyttaǵy ósim burynǵydan birneshe ese artty. Sý resýrstary jáne ırrıgasııa mınıstrliginiń dereginshe, qabyldanǵan keshendi sheshimder sýarmaly jerlerdi tıimdi paıdalanýǵa jol ashyp otyr, dep jazady Egemen.kz.
Mınıstrlik ázirlegen memlekettik qoldaý tetikteri sý únemdeý tehnologııalary qoldanylatyn alqaptardyń jyl saıynǵy ósimin 150 myń gektarǵa deıin jetkizýge múmkindik berdi. Bul kórsetkish Memleket basshysynyń tapsyrmalaryna sáıkes júzege asyp otyr. Al 2024 jylǵa deıin elimizde zamanaýı sýarý júıelerin engizý qarqyny jylyna orta eseppen 30 myń gektardy ǵana quraǵan edi. Demek, qazirgi qarqyn 5 ese artqan.
Búginde respýblıka boıynsha sý únemdeý tehnologııalary qoldanylatyn jalpy aýmaq 543,5 myń gektarǵa jetti. Bul aýyl sharýashylyǵy salasynda resýrsty únemdeýge jáne ónimdilikti arttyrýǵa baǵyttalǵan mańyzdy qadamdardyń biri sanalady.
Sý únemdeý júıelerin engizýdi yntalandyrý úshin memleket tarapynan naqty qoldaý sharalary qarastyrylǵan. Atap aıtqanda, uńǵyma burǵylaý, ınfraqurylym júrgizý jáne jabdyq satyp alý shyǵyndaryn óteý úlesi 50%-dan 80%-ǵa deıin ulǵaıtyldy. Sonymen qatar sýarmaly sýǵa saralanǵan tarıf engizildi. Aldaǵy úsh jylda sý únemdeý tehnologııalaryn paıdalanatyn sharýalar úshin sýarmaly sýdyń qunyn sýbsıdııalaý kólemi 50%-dan 85%-ǵa deıin artty.
Pákistandaǵy sý tasqynynan 17 adam qaza tapty
Budan bólek, 2026-2028 jyldarǵa arnalǵan kezeńde sý únemdeý tehnologııalaryn engizýdi sýbsıdııalaýǵa bólinetin qarajat kólemi aldyńǵy úsh jylmen salystyrǵanda 4 ese kóbeıtildi. Bul memleket tarapynan agrarlyq sektordaǵy tıimdi sý paıdalanýǵa basymdyq berilip otyrǵanyn kórsetedi.
Mınıstr Nurjan Nurjigitovtiń aıtýynsha, aldaǵy josparlar aýqymdy.
«2030 jylǵa qaraı sý únemdeý júıeleri qoldanylatyn sýarmaly alqap kólemin 1,3 mln gektarǵa jetkizý josparlanyp otyr. Bul tehnologııalar sýarý sýyn 30%-ǵa deıin únemdeýge múmkindik beredi. Sonymen qatar Sý resýrstary jáne ırrıgasııa mınıstrligi sý qoryn qorǵaý jáne paıdalaný salasyndaǵy eń úzdik qoljetimdi tehnologııalar tizimin ázirledi. Oǵan ozyq sýarý júıeleri de engizilgen», dedi mınıstr.
Osylaısha, Qazaqstanda sý resýrstaryn tıimdi basqarý baǵytynda júıeli jumys júrgizilip, zamanaýı tehnologııalardy keńinen engizý arqyly aýyl sharýashylyǵynyń turaqty damýyna jol ashylyp otyr.
Sý tasqyny: Qazaqstannyń birneshe óńirinde tasjoldardy sý basty