Bokstan Qazaqstan quramasynyń oqý-jattyǵý jıyndarynyń sońǵy kúninde qazaq boksynyń ardagerleri Almatydaǵy AIBA akademııasyna baryp, boksshylarǵa aq batasyn berdi. Bul týraly boks federasııasynyń baspasóz qyzmeti habarlady.
Qazaqstan quramasynyń bas bapkeri Myrzaǵalı Aıtjanovtyń aıtýy boıynsha aqsaqaldan aq bata alý quramanyń dástúrine aınalǵan eken.
«Naqtyraq aıtar bolsam, 2010 jyldan bastap jattyǵý jıyndaryna aqsaqaldardy shaqyrý dástúrge aınaldy. Bizdiń babalarymyz uly istiń aldynda Quran oqyp, bata alǵan. Biz de osy dástúr boıynsha baıraqty básekelerdiń aldynda aqsaqaldardyń batasyn alamyz. Bul joly Qazaqstan boks ardagerleriniń tóraǵasy Múslim Daıyrbekov kelip, batasyn berdi», – deıdi quramanyń bas bapkeri.
Aıta keteıik, byltyr Rıo Olımpıadasynyń aldynda Múslim Daıyrbekov, Ermahan Ybraıymov, Qazaqstan Ulttyq ǵylym akademııasynyń prezıdenti Murat Júrinov osy is-sharaǵa qatysyp, sportshylarymyzǵa aq jol tilegen.