Abaı oblysynda «Zań jáne tártip» bastamasy aıasynda ózin-ózi basqarý uıymdarynyń arasynda quiz zııatkerlik oıyny ótti, dep habarlaıdy Egemen.kz.
Uıymdastyrýshylardyń aıtýynsha, zııatkerlik saıystyń negizgi maqsaty – jastardyń shyǵarmashylyq jáne zııatkerlik qabiletterin shyńdaý, oı-órisin keńeıtý, ǵylym men bilimge degen qyzyǵýshylyǵyn arttyrý. Is-sharanyń ashylýynda Abaı oblysy Bilim basqarmasy basshysynyń orynbasary Ásem Núskenova qatysýshylarǵa sáttilik tilep, bastamanyń mańyzdylyǵyna toqtaldy.
«Búgingi is-shara «Zań jáne tártip» ıdeologııalyq narratıvi aıasynda ózin-ózi basqarý uıymdarynyń kóshbasshylary arasynda uıymdastyrylyp otyr. Bul – jastardyń quqyqtyq saýattylyǵyn arttyrýǵa, qoǵamdaǵy jaýapkershilik pen tártip qaǵıdattaryn tereń túsinýge baǵyttalǵan mańyzdy qadam. Osyndaı zııatkerlik alańdar oqýshylardyń bilimderin shyńdap qana qoımaı, tulǵalyq damýlaryna, kóshbasshylyq qasıetterin jetildirýge múmkindik beredi. Búgingi saıysta alǵan tájirıbe aldaǵy ómir joldaryńyzda úlken septigin tıgizedi dep senemin. Barshańyzǵa sáttilik pen jarqyn jeńis tileımin», dedi ol.
Saıysqa oblystyń qala jáne aýdandarynan 12 komanda qatysyp, jalpy sany 40-qa jýyq bilim berý uıymdarynyń ózin-ózi basqarý kóshbasshylary men mektep oqýshylary baq synasty.
Qatysýshy, Shoqan Ýálıhanov atyndaǵy «Jas Ulan» arnaıy erler mektep-lıseı ınternatynyń 11-synyp oqýshysy Muhammed Qudaıbergen jarysqa degen daıyndyqtary týraly aıtty.
«Biz bul kýız oıynyna úlken jaýapkershilikpen daıyndaldyq. Quqyqtyq taqyryptardy, el tarıhy men memlekettik saıasattyń negizgi baǵyttaryn qaıtalap, logıkalyq tapsyrmalarǵa arnaıy daıyndyq júrgizdik. Buǵan deıin de osyndaı aýqymdy saıystarǵa qatysyp, júldeli oryndarǵa ıe bolǵanbyz. Sondyqtan búgingi jarysta da óz bilimimizdi kórsetip, joǵary nátıje kórsetýge nıettimiz. Mundaı sharalar bizge tek bilimimizdi synap qana qoımaı, komandalyq jumys pen ózara qoldaýdyń mańyzyn túsinýge múmkindik beredi. Bizdiń toptyń ataýy – «Jas ulan», jáne biz jeńiske laıyqty bilimimizdi kórsetýge tyrysamyz», dedi ol.
Qatysýshylar quqyqtyq saýattylyq, memlekettik saıasattyń basym baǵyttary, el tarıhy jáne zamanaýı qoǵamdyq úderisterge qatysty 7 kezeń boıynsha synǵa tústi. Olar qoıylǵan suraqtarǵa jaýap berip, logıkalyq tapsyrmalardy oryndady. Is-shara barysynda jastar joǵary belsendilik tanytyp, óz bilimderi men kóshbasshylyq qabiletterin kórsete bildi. Saıys qorytyndysy boıynsha qazylar alqasynyń sheshimimen jeńimpazdar men júldegerler anyqtaldy.
«Eń kreatıvti komanda» nomınasııasymen Maqanshy aýdanynyń «Parasat» komandasy marapattaldy. Al «Úzdik estetıkalyq komanda» atalymyn Aıagóz aýdanynyń «Jas demokrat» komandasy ıelendi. Jalpy komandalyq esep nátıjesinde I oryndy Jańasemeı aýdanynyń «Bes arys» komandasy jeńip aldy. II oryn Abaı aýdanynyń «Ádilet» komandasyna buıyrsa, III oryndy Besqaraǵaı aýdanynyń «Keleshek urpaq» komandasy ıelendi. Jeńimpazdar men júldegerler arnaıy dıplomdarmen marapattaldy.
Uıymdastyrýshylar mundaı formattaǵy is-sharalar aldaǵy ýaqytta da jalǵasyn taýyp, óńir jastarynyń azamattyq jaýapkershiligin arttyrýǵa jáne zań ústemdigi qaǵıdattaryn nasıhattaýǵa qyzmet etetinin aıtty.