"Almaty-2" vokzaly mańynda aqyly avtoturaq iske qosyldy. Bul týraly "Almaty arnaıy parkıng qyzmeti" JShS baspasóz qyzmeti habarlady.
"Ol jerde bári retteldi. Adamdar yńǵaıly orynǵa toqtaı berse bolady. Qoǵamdyq kólik aıaldamasynda endi tura almaıdy. Biz turaqtaýǵa bolmaıtyn jerdi de syzyp kórsettik. Endi keptelis bolmaýyn qadaǵalaımyz. Qoǵamdyq kólikke arnalǵan bólikter bar, ol aqyly avtoturaq aýmaǵyna kirmeıdi", - deıdi kompanııa ókilderi.
322 orynǵa arnalǵan jańa aqyly avtoturaq Raıymbek dańǵylynan Týzov kóshesine deıin Abylaıhan dańǵylynyń boıymen, ary qaraı Týzov kóshesinen temirjol vokzalyna deıingi aýmaqty alyp jatyr. Jeltoqsan kóshesine deıingi vokzal mańyndaǵy jer de avtoturaqqa kirigip, ol jerge tórt parkomat ornatylǵan.
Avtoturaq úshin parkomatpen qatar, SMS habarlama (Beeline jáne Activ), "Almaty avtoturaqtary" arnaıy qosymshasy jáne Qiwi termınaldary arqyly tólem jasaýǵa bolady.