Bıyl ultymyzdyń birtýar tulǵalary negizin salǵan, mıllátiniń múddesi úshin «túnde uıyqtamaı, kúndiz otyrmaı», sol jolda ázız jandaryn qurban etse de, «Alda áli kúndi kóretin urpaq keledi. Sol kúndi kóretin urpaq senderdi eske alatyn bolady. Bizdi rızashylyqpen, úlken qurmetpen eske alatyn bolady!» dep bolashaqqa úmitpen kóz tikken «Alash» qozǵalysy men Alash Orda avtonomııaly úkimetiniń qurylǵanyna 100 jyl tolady. Elimiz úshin mańyzy aıryqsha datany laıyqty deńgeıde atap ótý maqsatynda Shyǵys Qazaqstanda birqatar rýhahı-mádenı is-sharalar legi bastalyp ta ketti. Osyndaı taǵylymy mol sharanyń biri retinde О́skemendegi Pýshkın atyndaǵy oblystyq kitaphanada ashylǵan «Alash» qozǵalysyna – 100 jyl» atty kórmeni aıtýǵa bolady.
– Bul kórmege eki aı boıy ázirlendik. Kitaphanadaǵy Alash tarıhyna qatysty dúnıelerdiń barlyǵyn súzgiden ótkizdik. Arnaıy tapsyrys berip, Alash arystarynyń portretterin jasattyq. Munyń bári jurt alash qaıratkerleri týraly bilip júrse, eń bolmasa, sýretterin kórip, kókeılerine túıse degen ıgi oıdan týyndaǵan edi, –deıdi kitaphananyń ólketaný sektorynyń jetekshisi Zıza Muhtarhanova.
Arnaıy stendterge toptastyrylǵan muraǵattyq qujattardy О́skemendegi oblystyq muraǵat usynypty. Kitaphana qyzmetkerleri bul kórmeniń jyl sońyna deıin jalǵasatynyn aıtady.
Ásem О́mirbekqyzy, stýdent:
– Kórmeden erekshe áser aldym. Alash arystary týraly bizdiń bilmeıtinimiz kóp eken. Qazaqtan shyqqan tuńǵysh magıstr Jaqyp Aqpaev jaıynda alǵash ret estip otyrmyn. Ol kisiniń Semeıdi Alash Ordanyń astanasy retinde usynǵanyn jurttyń kóbi bile bermeıdi dep oılaımyn. «Alash» baǵdarlamasyn ázirleýge atsalysqan Barlybek Syrtanov týraly, ol kisige Álıhan Bókeıhanovtyń 1911 jyly qazaqtardyń Konstıtýsııasyn jazýdy tapsyrǵany sekildi tyń derekter kórmede mol eken.
Azamat QASYM,
«Egemen Qazaqstan»
О́SKEMEN
Sýretterdi túsirgen avtor