Keshe Astanada «Ramada Plaza» qonaq úıinde Qazaqstan Respýblıkasyndaǵy kezekten tys prezıdent saılaýyn baqylaý jónindegi qoǵamdyq komıssııa birlestigi músheleri jýrnalıstermen óz málimdemelerin baıan etý maqsatynda baspasóz máslıhatyn ótkizdi. Ony atalǵan birlestiktiń teń tóraǵasy Nurlan Erimbetov júrgizip otyrdy.
Elimizdiń tanymal qoǵam qaıratkerleriniń bastamasymen qurylǵan bul qoǵamdyq komıssııa óziniń basty maqsatyn kezekten tys prezıdent saılaýyna obektıvti baǵa berý men onyń ádil, ashyq, erkin túrde ótýine yqpal etý dep túsindirdi. «Bizdiń bul jaýapty mindetimiz óz deńgeıinde atqaryldy dep málimdeımiz. Áýelden komıssııa qyzmetiniń basty prınsıpi retinde bekitilgen zań aıasynda komıssııa músheleriniń qandaı da bir partııaǵa qatyssyzdyǵy jáne bılikpen qarym-qatynasynyń bolmaýy naqtylandy. Munyń bári ótken saılaý naýqanyn shynaıy baǵalaýǵa múmkindik berdi», deıdi N.Erimbetov. Komıssııa músheleriniń málimdemesine súıensek, jalpy alǵanda, bul saılaý Qazaqstan zańnamasynyń talaptaryna jáne moıyndalǵan demokratııalyq standarttarǵa sáıkes ótken. Memlekettik ókiletti organdar barlyq kandıdattar úshin teń jaǵdaı men qoldanystaǵy zańnamany saqtaýdy, sonymen qatar olarǵa buqaralyq aqparat quraldaryna teńdeı qoljetimdilikti qamtamasyz etýdi, saılaýdy ádiletti jáne ashyq ótkizýdi qamtamasyz etken. Belgili bolǵan basty nárse qoǵamnyń uıysýy men ulttyq birliktiń jańa deńgeıge kóterilip, azamattardyń elektoraldy jáne quqyqtyq mádenıetiniń óskendigi. Buǵan atalmysh komıssııanyń aldyn-ala anyqtaǵan deregine sáıkes, jalpy saılaýshylardyń 91,3 paıyzdy quraýy anyq dálel.
Qoǵamdyq komıssııanyń qyzmeti – ashyqtyq ustanymyn qamtamasyz etip, Ortalyq saılaý komıssııasymen, Azamattyq ınstıtýt jáne halyqaralyq uıymdarmen saılaý prosesindegi buzýshylyqtardyń aldyn alý jáne saqtandyrý boıynsha birlese jumys isteýge baǵyttalǵan. Bul komıssııa sonymen birge, saılaý prosesteriniń halyqaralyq standarttarǵa sáıkes ótýine yqpal etýge de baryn salǵany málimdemede kórsetilgen. Komıssııa jumysynyń keń aýqymda ótýine elimizde qalyptasyp kele jatqan jastardyń erikti qozǵalystary da yqpal etken.
– Qoǵamdyq baqylaýdy iske asyrý maqsatynda birlestik 5890 erikti baıqaýshylardy daıarlyqtan ótkizdi. Olardyń basym bóligi stýdent jastar. Sondyqtan biz saılaý ýchaskeleriniń 60 paıyzyn baqylaýmen qamtydyq. Bul naýqan Qazaqstan qoǵamyn demokratııalandyrýda mańyzdy orynǵa ıe bolyp, sheshim qabyldaýda da erkindikti qamtamasyz etti. Ol óz kezeginde qoǵamdyq-saıası ınstıtýttarǵa senim ornaǵanyn kórsetedi. Biz barlyq eriktiler men demeýshilerge azamattyq qoǵam ınstıtýttaryna, ásirese, sheteldik baıqaýshylarǵa ózimizdi belsendi qoldaǵany úshin sheksiz alǵysymyzdy bildiremiz, deıdi jıynǵa qatysqan komıssııa músheleri.
Ábdirahman QYDYRBEK.