Jankúıerlerdi jeliktirgen báıge

Halqymyzda «Jaqsy at – jeliktiredi, jaman at zeriktiredi», degen támsil bar. Oǵan árkezde bolatyn at báıgesinde kóz jetkizip júrmiz. Táýelsizdigimizdiń 20 jyldyǵy men áz Naýryz meıramy qurmetine Taldyqorǵan qalasyndaǵy ótken jarysqa alys pen na­mysqa shabatyn sáıgúlikter qaty­syp, mereı ósirdi. Qalanyń batysyndaǵy atshabar alańyna jınalǵan halyq aldynda oblys ákimi Serik Úmbetov sóılep, tu­ǵyry bıik Táýelsiz­digi­miz­diń ótken jyldaryndaǵy qol jetkizgen je­tistikterge toqtaldy. Shabandozdarǵa sát­tilik tiledi. Elimizdiń Ánuranynyń asqaq rýhy ár kóńildi kókke kóterdi. Budan soń jarys jolyna jeti shaqy­rym­dyq qashyqtyqqa shabatyn qunandar shyqty. Aınalym saıyn baǵy men baby jarasqan Jambyl aýdanynyń «Qaraqusy» aldyna qara salmaı, márege dara jetti. Osylaısha qunannyń qulaǵynda oınaǵan qara bala sáıgúlik ıesine qýanysh syılady. Júldeli ekinshi oryn qyzylordalyq «Botakóz» atty júıriktiń enshisine tıse, Jambyl obly­synyń tulpary úshinshi oryndy mise tutty. Shabandozdarǵa avtokólik kiltteri tap­syrylyp, mereıleri ósti. Jarys jolyna shyqqan top báıgege aty aıtqandaı, otyzdan astam júı­rik qa­tysty. Aýyzdy­ǵy­men alysyp, qar­sylastaryn qapy qaldyrǵan Kerbulaq aýda­ny­n­an kelgen Aqylbaı Aq­ber­lınovtiń «Baı­suń­qary» ıesine «Jı­gýlıdiń» kil­­tin áperdi. Keıingi oryn­dardy Jambyl ob­ly­sy men Qarasaı aý­danynyń júırikteri bólisti. Jalpy sońǵy jyldary jorǵa ja­ry­syna qatysatyn tórt túlik tóre­leri­niń qatary ósý ústinde. Tórt aıa­ǵyn teń basqan, sý tógilmes jorǵalar arasynda Jambyl aýdanynyń «Baıa­ny» bas júl­dege, talǵarlyq «Lan­dysh» ekinshi, Sar­­qan aýdanynyń jorǵasy úshinshi orynǵa kóterilip, shabandoz ben ıe­leri­niń abyroıyn asqaqtatty. Kúmisjan BAIJAN, Almaty oblysy.