Qazaq aqyndarynyń shyǵarmalary ıspan tiline aýdaryldy. Ádebıet tarıhynda tuńǵysh ret Pıreneı túbeginde qazaq sóziniń rýhy asqaqtady. XIX ǵasyrdan bastap búginge deıingi kórnekti aqyndardyń týyndylary engen antologııanyń tusaýkeser rásimi Ispanııanyń Madrıd qalasynda ótti.
Qazaqstan men Ispanııa arasynda dıplomatııalyq qarym-qatynastar ornaǵanyna 25 jyl tolýyna oraılastyrylǵan saltanatty sharaǵa Ispan Pen-klýbynyń bas hatshysy, Neopolıtan jáne Mallarme Parıj akademııasynyń korrespondent-múshesi, Eýropa aqyndary festıvaliniń negizgi quryltaıshysy, atalmysh antologııanyń ádebı aýdarmasyn jasaǵan Hýsto Horhe Padron bastaǵan zııaly qaýym ókilderi qatysty.
Qazaqstannyń Ispanııadaǵy elshisi Baqyt Dúısenbaev bul jobanyń eki el arasyndaǵy rýhanı baılanysty nyǵaıtýdaǵy mańyzy zor ekenine toqtaldy. «Antologııa Ispanııadaǵy barlyq kitap dúkenderine taratylady. Bir kitappen shektelip qalmaı, bolashaqta basqa da qazaq aqyndarynyń shyǵarmalaryn aýdarýdy, nasıhattaýdy josparlap otyrmyz», dedi ol.
Alpystan astam qazaq aqyndarynyń óleńderin ıspansha sóıletken aýdarmashy Hose Horhe Padron baıandama jasap, Abaı Qunanbaev, Mirjaqyp Dýlatov, Qasym Amanjolovpen birge Dáýletkereı Kápulynyń da týyndylaryn oqyp berdi. «Elý jylǵa jýyq ýaqyt álem aqyndarynyń óleńderin aýdaryp kelemin. Osy antologııamen jumys istegende júzdegen qazaq aqynynyń shyǵarmashylyǵymen tanystym. Shuraıly da kórkem tilderi meni birden baýrap aldy. Qazaq ádebıetiniń kókjıegi keń, keleshegi kemel», – dep atap ótti H.Padron.
Tusaýkeser rásimine antologııany qurastyrǵan aqyndar Dáýren Berikqajyuly men Tanakóz Tolqynqyzy arnaıy bardy. Sondaı-aq, óleńderi antologııaǵa engen Ońaıgúl Turjan, Almas Ahmetbekuly, Dáýletkereı Kápuly, Saǵynysh Namazshamova, Anar Shamshadınova, Janar Ábsadyq, Janar Aılashevamen birge osy joldardyń avtory da qatysty.
Baqytgúl BABASh,
«Egemen Qazaqstan»