Olımpıada chempıony Danııar Eleýsinov AQSh-ta ótkizetin jattyǵýlary, jańa jattyqtyrýshysy jaıly oı bólisti. Bul týraly vesti.kz habarlady.
«Osy aıdyń sońynda nemese aldaǵy aıdyń basynda Amerıkaǵa jol júremin dep josparlap otyrmyn. Ázirge anyq-qanyǵy belgisiz. Biraq aǵammen (Dáýren Eleýsinov – kásipqoı boksshy) jáne ákemmen birge jattyǵatynym anyq», – dedi Rıo Olımpıadasynyń chempıony.
AQSh-ta Eleýsinov jańa bapkerdiń qol astynda jattyǵady. Bul jóninde ol:
«Olımpıadanyń aldynda kelip, Derek Santospen birge daıyndaldym. Boksshylarǵa degen qarym-qatynasyn, jattyǵý tásilderin kórdim. Bilikti bapker, adamı turǵydan da jaqsy kisi. Onymen birge jumys isteý de yńǵaıly», – dedi ol.
«AQSh-qa otbasymdy tolyǵymen alyp ketemin. Ýaqytymnyń kóbi sol jaqta ótetindikten jaqyndarym ylǵı da meniń qasymda, maǵan qoldaý berip júredi. Árıne, muhıttyń arǵy betinde qalyp qoıamyn dep aıtpaımyn. Jekpe-jekterimnen keıin Qazaqstanǵa jıi kelip turamyn», – dedi Danııar.
Aıta keteıik, 25 jastaǵy boksshy ótken jyldyń tamyz aıynda 69 kılo salmaqta Olımpıada chempıony atanǵan. Al kásipqoı boksqa aýysý týraly 12 qańtarda sheshim qabyldady. Munda ol jartylaı orta salmaqta (66 kıloǵa deıin) judyryqtasady. Alǵashqy jekpe-jegi osy jyldyń mamyr aıynda Qytaıda ótedi.
Kásipqoı bokstaǵy Danııardyń basty qarsylastary týraly aqparatty myna jerden bile alasyz.