Premer-Mınıstr Baqytjan Saǵyntaevtyń tóraǵalyǵymen ótken Úkimet otyrysynda ortalyq jáne jergilikti atqarýshy organdardyń 2017 jylǵy sý tasqyny kezeńine daıyndyǵy týraly másele qaraldy, dep jazady primeminister.kz.
Aýyl sharýashylyǵy mınıstrligi gıdrotehnıkalyq qurylystardyń sý tasqyny kezeńine daıyndyǵy boıynsha is-sharalar keshenin qabyldady. Sý tasqynyna qarsy komıssııa quryldy. Bul týraly aýyl sharýashylyǵy vıse-mınıstri Qaırat Aıtýǵanov baıandady.
2017 jylǵy 17 aqpandaǵy jaǵdaı boıynsha respýblıkalyq menshikte «Qazsýshar» RMK teńgeriminde 2 177 gıdrotehnıkalyq qurylys, olardyń ishinde 78 sý qoımasy, 83 sý toraby, 26 bóget jáne 1 990 basqa da qurylystar bar. Jalpy barlyq sý qoımalary iske qosylǵan jáne 2017 jylǵy kóktemgi sý tasqynyn qabyldaýǵa syıymdylyqqa ıe, dep atap ótti vıse-mınıstr.
«Sý resýrstary jónindegi komıtettiń basseındik ınspeksııalary tótenshe jaǵdaılar, ekologııa aýmaqtyq organdarymen jáne jergilikti atqarýshy organdarmen birge 761 gıdrotehnıkalyq qurylysqa vızýaldy zertteý júrgizdi. Respýblıka boıynsha 27 gıdrotehnıkalyq qurylys qanaǵattanǵysyz jaǵdaıda ekeni anyqtaldy, sý tasqyny jáne sel kezinde qıraý qaýpi ulǵaıýda. Basseındik ınspeksııalar osy gıdrotehnıkalyq qurylystardyń ıelerine anyqtalǵan olqylyqtardy joıý týraly uıǵarymdar berdi jáne tasqyn sýdy qaýipsiz ótkizý boıynsha sharalar qabyldaý qajettigi týraly hattar jiberdi», - dedi Q. Aıtýǵanov.
Sý tasqynyna qatysty tótenshe jaǵdaıǵa «Qazsýshar» RMK 10 myń m3 kólemde ınertti materıaldardyń, 678 tonna janar-jaǵarmaı materıaldarynyń, 41 myń dana ydys-qaptyń apatty qoryn jasaqtady, sondaı-aq 246 birlik arnaıy tehnıka jáne 31 birlik júzý quraly ázirlengen.
«Jalpy búgingi tańda respýblıkalyq menshiktegi nysandardaǵy sý sharýashylyǵy jaǵdaıy turaqty jáne turaqty baqylaýda», - dep sendirdi vıse-mınıstr.