Astana qalasyndaǵy Balalar úıinde búginde 117 bala tárbıelenedi. Taǵdyr taýqymetimen úlken otbasynda bastary qosylǵan búldirshinderdiń jaǵdaıymen tanysý maqsatynda «Egemen Qazaqstan» gazetiniń qyzmetkerleri atalǵan ortalyqta boldy. Qazaq tiline jetik balaqaılar redaksııa qyzmetkerlerine óleń oqyp, ertegi aıtyp berdi. Bas basylym basshysy Darhan Qydyráli mekeme qyzmetkerlerine gazettiń jańa jobalary arasynda óskeleń urpaqtyń tálim-tárbıesine erekshe kóńil bólinip otyrǵanyn áńgimelep, «Egemen Qazaqstan» kitaphanasy» serııasymen jaryq kórgen birqatar jınaqtardy syılady jáne redaksııanyń kásipodaq uıymy atynan syı-syıapattardy tabys etti. Kezdesýge basylymnyń Súleımen Mámet, Berik Sadyr, Dýman Anash jáne Orynbaı Balmurat syndy shyǵarmashylyq qyzmetkerleri qatysty.
Mekeme dırektorynyń orynbasary Oksana Dzıýbanyń aıtýynsha, tárbıelenýshiler qaladaǵy №8 jáne T.Aıbergenov atyndaǵy №16 orta mektepterde bilim alady. Sondaı-aq, ortalyqtyń jeke balabaqshasynda 10 bala tárbıelenýde.
"Balalarymyzdyń kóńil-kúıi jaqsy. О́ıtkeni, Elbasynyń, memleketimizdiń qamqorlyǵynyń arqasynda zamanǵa saı bilim men tárbıe alýyna, ónerlerin ushtastyrýyna barlyq jaǵdaı jasalyp otyr. Bı, dombyra, kórkem óner jáne sport úıirmeleri jumys isteıdi. Bir ýaq dalada syrǵanaq, konkı teýip oınaıdy. Sondaı-aq, qala syrtynda «Juldyz» atty jeke demalys lagerimiz bar. Jaz mezgilinde jáne qystygúni demalys kúnderi balalar osy lagerde ýaqyttaryn tıimdi ótkizedi. Qysta shańǵy tebý, jazda dop oınaý sııaqty jarystar uıymdastyrylady," – deıdi Oksana Vladımırovna.
Jalpy, atalǵan mekeme qyzmetkerleri sońǵy jyldary tárbıelenýshiler qatarynyń azaıǵanyn aıtady. Balalar úıi janynan otbasylyq qoldaý ortalyǵy ashylǵan. Munda óziniń jan jylýyn, meıirimin syılaǵysy kelgen azamattarǵa esik ashyq.
"Ár balanyń tárbıesin júregimizden ótkizemiz. Balalar úıinen keıingi ómirlerin de qadaǵalap otyramyz. Oqýǵa túsýi, jataqhanaǵa ornalasýy, keıinnen jaqsy jumysqa turýy, otbasyn qurýy syndy máselelerine qoldaý kórsetemiz," – deıdi atalǵan ujymda 20 jyldan astam ýaqyt boıy eńbek etip kele jatqan aǵa tárbıeshi Bátesh Esilbaeva.
Ol balalar úıine burynǵy túlekterdiń de jıi at basyn buryp, ini-qaryndastarymen qaýyshyp, tárbıeshilerimen qýanyshtary men áleýmettik jaǵdaılaryn bólisip turatynyn jetkizdi. Solardyń biri, L.Gýmılev atyndaǵy EUÝ Jýrnalıstıka jáne saıasattaný fakýltetinde bilim alyp jatqan Vladıslav esimdi tárbıelenýshi oqýyn bıyl támamdamaq. О́zge de túlekter Slava sııaqty ushqan uıasyn umytpaıdy.
Dýman ANASh, "Egemen Qazaqstan"