Elordada Astana qalasynyń ákimi Áset Isekeshevtiń tapsyrmasymen polısııa qyzmetkerleri tústi jáne qara metall (kabel, lıýk qaqpaqtary) urlaýdyń aldyn alýǵa baǵyttalǵan jedel aldyn alý is-sharasyn ótkizýde, dep habarlady Astana ákimi apparatynyń baspasóz qyzmeti.
Astana qalasynyń kásipkerlik jáne ónerkásip basqarmasynyń málimetinshe, Astanada tústi jáne qara metall qabyldaıtyn 93 pýnkt jumys isteıdi, sonyń ishinde 18-iniń lısenzııasy bolsa, 75 pýnkttiń tıisti qujattary joq.
Astana qalasy IID-niń habarlaýynsha, jedel aldyn alý is-sharasy barysynda metall qabyldaıtyn 55 pýnkt tekserilip, qosymsha 8 pýnkt anyqtaldy. Atalǵan pýnktter tirkelmegen jáne metall qabyldaýǵa ruqsat qujattary joq. Shara barysynda túrli buzýshylyqtar úshin 28 adam ákimshilik jaýapkershilikke tartyldy. Tústi jáne qara metall urlaýdyń 5 deregi tirkelip, aıyptylar ustaldy. Tergeý júrgizilýde.