Álemdegi úzdik bapkerlerdiń biri Freddı Roých kópshilik arasynda qyzý talqylanyp jatqan jeńil salmaqtaǵy UFC chempıony Konor Makgregor men bes salmaq dárejesindegi álemniń burynǵy chempıony kishi Floıd Meıýezer arasyndaǵy jekpe-jek jaıly pikir bildirdi. Bul týraly allfight.ru habarlady.
«Qazir biz basqa kezeńde ómir súrip júrmiz. Jurt arasynda qyzý talqylanyp jatqannan keıin bul aıqas uıymdastyrylady dep shamalap otyrmyn. Maǵan tipti, bul keshtiń ótetinin, osydan qomaqty qarjy tabýǵa bolatynyn Floıdtyń ózi aıtty. Konor – UFC chempıony, Floıd – uly boksshy. Amerıkalyq soqqylardan tez sytylyp shyǵa biledi. Al Makgregorǵa boks stıline daıyndalý úshin biraz ýaqyt qajet. Árıne, ekeýi sharshy alańda jekpe-jek ótkizetindikten Meıýezer favorıt bolyp esepteledi. Biraq kezdesýdi bir ǵana soqqy sheship ketýi múmkin ekendigin de esten shyǵarmaǵan jón», – dedi Freddı Roých.
Makgregor aralas jekpe-jekte sońǵy aıqasyn ótken jyldyń qarasha aıynda Eddı Alvareske qarsy ótkizgen. Osydan keıin úzilis alatynyn málimdedi. Al kishi Floıdpen sharshy alańda judyryqtasý úshin áýesqoı boksta álem chempıony, otandasy Maıkl Konlanmen jattyǵyp júr. Buǵan deıin amerıkalyq boksshymen 1 mlrd dollar bolatyn urysy 2018 jyldyń basynda ótetinin aıtqan.
Konlan – Londonda ótken jazǵy Olımpıada oıyndarynyń qola júldegeri, álem jáne Eýropa chempıony.
Aıta keteıik, ırlandııalyq sportshy MMA-de 24 kezdesý ótkizip, 21-in jeńispen aıaqtasa, úsheýinde ese jibergen. Al kishi Meıýezer sharshy alańdaǵy 49 jekpe-jeginiń bárinde jeńiske jetken.