EKSPO-2017 aıasynda úzdik startap jobaǵa 20 myń eýro syıaqy beriledi. Bul týraly búgin elordadaǵy Táýelsizdik saraıynda ótip jatqan EKSPO-2017 kórmesine qatysýshylardyń úshinshi jınalysy aıasynda uıymdastyrylǵan baspasóz máslıhatynda Halyqaralyq kórmeler bıýrosynyń bas hatshysy Vısente Lossertales málim etti, dep habarlaıdy QazAqparat.
Onyń aıtýynsha, elordada ótetin halyqaralyq kórme aıasynda startaptar arasynda oınatylatyn EXPO-Cosmos syılyǵyn tabystaý rásimi uıymdastyrylady.
«Bul Halyqaralyq kórmeler bıýrosy men EKSPO-90 qory negizin qalaǵan áleýmettik joba sanalady. Ol kórme aıasynda osymen besinshi ret tabys etilmek. Syıaqynyń kólemi 20 myń eýrony quraıdy», - dedi ol.
Lossertalestiń aıtýynsha, jobany damytýǵa arnalǵan startap túrindegi syıaqy ádette áleýmettik saladaǵy úzdik ınnovasııalyq jobalarǵa beriledi.
«Astanada basty taqyryp bolashaq energııasy bolmaq. Sondyqtan syılyq ekologııamen baılanysty bastamalardy qoldaýǵa jáne damytýǵa arnalatyn bolady», - dep naqtylady Halyqaralyq kórmeler bıýrosynyń bas hatshysy.
Aıta keterligi, EKSPO-2017 halyqaralyq mamandandyrylǵan kórmesi ústimizdegi jyldyń 10 maýsymynda bastalyp, 10 qyrkúıekte aıaqtalady. Kórmege 2 mıllıonnan astam adam keledi dep kútilýde. Olar kórmeni keminde eki márte aralaıdy dep josparlanǵan.
Jalpy kórmeni tamashalaýshylardyń 85 paıyzyn Qazaqstan azamattary, al qalǵan 15 paıyzyn sheteldikter quraıdy. Sheteldikterdiń basym bóligin TMD elderiniń jáne Qytaıdyń azamattary quraıdy dep kútilýde. Qazirgi ýaqytta 112 memleket pen 18 halyqaralyq uıym EKSPO kórmesine qatysatyndyǵyn resmı túrde rastap otyr.