Ortalyq kommýnıkasııalar qyzmetinde Bilim jáne ǵylym mınıstrligi bilim salasynda elektrondyq júıeni engizý maqsatynda jasalynyp jatqan serpindi jobalar týraly baspasóz máslıhatyn ótkizdi.
Oǵan mınıstrliktiń aqparattyq tehnologııalar departamenti dırektory Almat Ishanov, zań departamentiniń dırektory Nurseıit Baıjanov, mektepke deıingi jáne orta bilim departamentiniń dırektory Jańyl Jontaeva qatysty.
Atalǵan vedomstvonyń ókilderi elimizde elektrondyq kúndelikter júıesiniń qanatqaqty jobalary týraly baıandady.
Bul jobany 2015 jyly «Kúndelik» SAJ usynǵan bolatyn. Ol elektrondyq jýrnaldar men kúndelikter jobasy boıynsha memlekettik-jekemenshik áriptestigi tujyrymdamasynyń jobasyn usyndy. Osyǵan baılanysty mınıstrlik jobanyń tıimdiligin qarastyryp, ýákiletti organdarǵa jiberdi. Al byltyr tujyrymdama jobasy Aqparat jáne kommýnıkasııalar mınıstrligi, «Atameken» UKP men «MJÁ Ortalyǵy» AQ-na joldandy.
«Qazirgi ýaqytta Kundelik.kz resýrsy «Aqparattandyrý týraly» zańǵa sáıkes aqparattyq júıelerdiń memlekettik biryńǵaı operatory – «Ulttyq aqparattyq tehnologııalar» AQ ınfraqurylymynda ornalastyryldy. Búginde júıege 3887 mektep pen 2,5 mln. adam tirkelgen. Olardyń ishinde 174 006 muǵalim, 1 467 286 oqýshy men 854 280 balanyń ata-anasy bar. Júıeni barlyq oblystar men Astana jáne Almaty qalalarynyń bilim basqarmalary men 177 qalalyq jáne aýdandyq bilim bólimderiniń 156 qoldanyp otyr», – dedi A.Ishanov.
Brıfıngte mınıstrliktiń ókili áriptes kompanııamen tikeleı kelissózder júrgizip, júıeni jetildirý boıynsha barlyq usynystardyń qarastyrylyp jatqanyn aıtty. Sonymen birge, ol qazirgi kezde «Kúndelik» kompanııasynyń iskerlik bedeline nuqsan keltiretin aqparattardyń tarap jatqanyn da jasyrmady. Osyǵan baılanysty ol jıynda serpindi jobanyń máni men mańyzy týraly keńirek aıtyp berdi.
«Kúndelik» júıesine elimizdiń kez-kelgen mektebi qalaǵan ýaqytynda tegin qosyla alady. Ol mektepterdiń oqýshylary men olardyń ata-analary óz baǵalaryn, úı tapsyrmalaryn, sabaq kestelerin, mekteptegi jańalyqtardy jáne basqa da aqparatty qarap otyrýǵa arnalǵan. Ata-ana óz paıdalanýshy aty men qupııasóz arqyly kundelik.kz saıtyna kirip, «Balalar» – «Kúndelik» degen bólimderi arqyly óz balasynyń elektrondy kúndeligine kirip, onyń baǵalaryn, úı tapsyrmalaryn tegin kóre alady. Mektepterden de saıtty paıdalaný úshin eshqandaı tólem alynbaıdy», – dedi ol.
Jıynda osy máselege baılanysty Jańyl Jontaeva da óz oılarymen bólisti. Ol basqa jobalarǵa qaraǵanda, Kundelik.kz jobasy bıýdjetten qarjylandyrylmaıtynyn, onyń jumysyn jetildirýge salyq tóleýshilerdiń bir tıyny da jumsalmaıtynyn eskertti. Sol sııaqty ol Kundelik.kz júıesine tirkelgen adamdar týraly aqparattardyń bári zańmen qorǵalyp, onyń qaýipsizdigine memlekettiń ózi kepildik beretinin atap ótti. Osy oraıda ol júıege tirkelgen kezinde JSN jolyn toltyrý mindetti emes, oqýshynyń ata-anasyna tirkelý úshin tolyq aty-jónin, týǵan kúnin habarlaý jetkilikti ekenin aıtty.
Dastan KENJALIN,
«Egemen Qazaqstan»