21 aqpanda Qazaqstan Syrtqy ister mınıstriniń orynbasary Roman Vasılenko BUU Qaýipsizdik Keńesinde mınıstrlik deńgeıinde «Halyqaralyq beıbitshilik pen qaýipsizdikti saqtaý: Eýropadaǵy qaqtyǵystar» taqyrybynda ótken ashyq pikirsaıysqa qatysty, dep habarlady Syrtqy ister mınıstrliginiń baspasóz qyzmeti.
Qazaqstanda Sırııa boıynsha kelissózder barysynda óziniń tıimdiligin kórsetken Astana platformasy basqa da daý-janjaldardy sheshý maqsatynda keńinen qoldanylýy múmkin dep esepteıdi, dep atap ótti qazaqstandyq dıplomat óz sózinde. Onyń aıtýynsha, mundaı alań halyqaralyq quqyqtyń negizgi qaǵıdattaryna senimdi qalpyna keltirý jáne oǵan degen adaldyqty qaıtadan rastaý úshin, sondaı-aq, barlyq taraptardyń ulttyq múddelerin qurmetteý úshin búginde óte mańyzdy.
R.Vasılenko Eýropa betpe-bet kelip otyrǵan zańsyz kóshi-qon, uıymdasqan qylmys, adam saýdasy sııaqty óse túsip otyrǵan úreı men senimsizdik ahýaly arqyly odan beter tereńdeı túsken syn-qaterlerdi atap kórsetti.
Qazaqstan Prezıdenti Nursultan Nazarbaevtyń BUU Bas Assambleıasynyń 70-shi sessııasynda aıtqan halyqaralyq qaýymdastyqtyń nazaryn daý-janjaldardyń aldyn alý jónindegi jańa strategııany damytýǵa baǵyttaý qajettigi týraly ıdeıasynyń osy oraıda meılinshe kókeıkesti ekeni atap ótildi.
Qazaqstandyq delegasııa basshysy pikirsaıysqa qatysýshylarǵa Qazaqstannyń óziniń 2017-2018 jyldardaǵy BUU QK jumysynda Memleket basshysy jarııalaǵan «Álem. HHI ǵasyr» manıfesi men 2017 jyldyń qańtaryndaǵy Keńes múshelerine Saıası úndeýi sııaqty sheshýshi qujattardyń erejelerin basshylyqqa alatynyn jetkizdi.
Astana eýropalyq qurlyqtaǵy daý-janjaldar aımaǵyndaǵy ahýaldardy halyqaralyq quqyq normalaryna jáne olardy retteýdiń jumys istep turǵan halyqaralyq mehanızmderine sáıkes beıbit retteýdi qoldaıdy, dep atap ótti spıker. Qazaqstan el astanasynda sammıt ótkizýmen jáne deklarasııa qabyldaýmen tabysty qorytyndylanǵan 2010 jylǵy EQYU-ǵa tóraǵalyǵy barysynda óziniń osyndaı kózqarasyn aıryqsha aıqyn kórsete bildi. Negizinen alǵanda bizdiń elimizdiń jáne Prezıdent Nursultan Nazarbaevtyń jeke úlesiniń arqasynda 2015 jyly Mınsk kelisimin bekitýge ákelgen Ýkraına daǵdarysyn sheshý jónindegi beıbit kelissózder tetigi iske qosyldy, al 2010 jyly Qyrǵyzstandaǵy jaǵdaıdy turaqtandyrýdyń sáti tústi.
Qazaqstan tarapynan usynylǵan pozısııalar BUU Bas hatshysy Antonıo Gýterreshtiń, EQYU Bas hatshysy Lamberto Zanerdiń jáne basqa da pikirsaıysqa qatysýshylardyń sóılegen sózderimen úndes shyqty.
Sóıleýshiler Eýropada turaqtylyq pen qaýipsizdikti saqtaýda, sondaı-aq, daý-janjaldardy saıası jáne dıplomatııalyq quraldarmen beıbit kelissózder jolymen sheshýde múddeli taraptardyń birlesken kúsh-jigeriniń mańyzdy ekenin atap kórsetti.
Otyrysqa Avstrııanyń, Ázerbaıjannyń, Grýzııanyń, Germanııanyń, Vengrııanyń, Moldovanyń, Latvııanyń, Lıtvanyń, Rýmynııanyń, Sınegaldyń, Fınlıandııanyń, Horvatııanyń, Shvesııanyń syrtqy saıasat vedomstvolarynyń basshylary men syrtqy saıasat vedomstvolary basshylarynyń orynbasarlary, sondaı-aq, BUU-ǵa múshe memleketterdiń 80-nen astam delegasııalary qatysty.
BUU QK pikirsaıysy alańynda R.Vasılenko Eýropalyq syrtqy is-qımyldar qyzmetiniń bas hatshysy Helga Shmıdpen, Vengrııanyń syrtqy ister mınıstri Peter Sıııartomen qysqa kezdesýler ótkizdi.
Sondaı-aq, BUU Bas hatshysynyń saıası máseleler boıynsha orynbasary Djeffrı Feltmanmen kezdesý boldy. Kezdesý barysynda taraptar jahandyq kún tártibindegi kókeıkesti máseleler jóninde pikir almasyp, elimizdiń basty halyqaralyq uıymǵa músheliginiń 25 jyldyǵy qarsańyndaǵy Qazaqstannyń BUU-men ózara baılanysy áńgime arqaýyna aınaldy.
R.Vasılenko qatysýshylarǵa Qazaqstandaǵy mańyzdy ishki saıası ózgerister týraly baıandady, atap aıtqanda, Prezıdenttiń konstıtýsııalyq reforma arqyly bılik ókilettikterin Parlamentke berýge negiz qalaıtyn jáne eldegi odan arǵy demokratııalyq qaıta qurýlarǵa jańa serpin beretin Qazaqstan halqyna arnaıy Úndeýiniń mazmunymen tanystyrdy.
Qazaqstan Prezıdentiniń «Qazaqstannyń Úshinshi jańǵyrýy: jahandyq básekege qabilettilik» atty Joldaýy týraly aqparat ta jınalǵandardyń úlken qyzyǵýshylyǵyn týdyrdy.