Juban Moldaǵalıev atyndaǵy Batys Qazaqstan oblystyq kitaphanasy, Abaı atyndaǵy Shyǵys Qazaqstan oblystyq kitaphanasy jáne Batys Qazaqstan oblysy Syrym aýdany ákimdigi onlaın-rejimde bas qosyp, bıylǵy Alash toıyn uıymshyldyqpen atap ótý jóninde keńesti. Bul sharanyń ótýine Syrym aýdany ákimdigi muryndyq boldy.
– Bul konferensııa «Nur Otan» partııasynyń «Uly dala qazynasy» partııalyq baǵytyna sáıkes uıymdastyrylyp otyr. Qazaq memlekettilik ıdeıasynyń jasampazdyǵyn, qazaq zııalylarynyń qaıratkerligin nasıhattaý – árbirimizge ortaq sharýa. Bıyl Alash qozǵalysyna 100 jyl, al osy qozǵalystyń belsendi qaıratkeri, zańger Jahansha Dosmuhamedulynyń týǵanyna 130 jyl tolady. Bul eki datanyń da Syrym aýdanyna tikeleı qatysy bar. Mundaı sharalardy birlese ótkizgenimiz abzal, – dedi Syrym aýdanynyń ákimi Abat Shynybekov.
Jalpy, Alash qozǵalysyna qatysty derekterdi zertteý jumysy Shyǵys Qazaqstan oblysynda jaqsy jolǵa qoıylǵan. Bul óńirde arnaıy ǵylymı ortalyq 2008 jyldan beri jumys istep keledi. Búginge deıin birneshe ondaǵan jınaq jaryq kórgen. Batysqazaqstandyq alashtanýshy Dámetken Súleımenova «bizdiń oblysqa da osyndaı ortalyq kerek» degen usynysyn jetkizdi. Semeıdegi Alash ǴZ ortalyǵynyń dırektory Shańbaı Turdyquldyń pikirinshe, alashtanýshy ǵalymdar bir-birimen derek almasyp, qoıan-qoltyq jumys istese, nátıje de kóp bolmaq.
Osydan birneshe jyl buryn jalpy bilim beretin mektepterde Alashtaný fakýltatıvtik kýrstaryn júrgizý týraly nusqaý berilgen edi. Kýrstyń arnaıy baǵdarlamasy da daıyndalǵan. Alaıda, bul fakýltatıvtik kýrstar júrgizilgen joq, jumys bastalmaı jatyp toqtatyldy.
– Alash qozǵalysy jaıly oqýshylar tereń bilýi tıis. Men osy kýrstardyń júrgizilgenin qalaımyn, – dedi Syrym aýdany Bulan orta mektebindegi tarıh pániniń muǵalimi Serik Zııatov.
Qazbek QUTTYMURATULY,
«Egemen Qazaqstan»
ORAL