Qazaq eliniń qarymyn qýattaıdy

Qazaqstannyń BUU músheligine ótkenine 25 jyl tolýyna oraı ál-Farabı atyndaǵy Qazaq ulttyq ýnıversıtetinde saltanatty jıyn ótti. Oǵan Syrtqy ister mınıstrliginiń, BUU Qoǵamdyq aqparat departamentiniń, qalalyq ákimdiktiń, dıplomatııalyq ókildikter men halyqaralyq uıymdar ókilderi jáne Almaty qalasynyń joǵary oqý oryndarynyń oqytýshylary men stýdentteri qatysty. QazUÝ prorektory Mu­ham­betqalı Búrkitbaev «Ýnı­versıtetimiz búginde BUU bilim jáne ǵylym salasynyń bar­lyq qurylymyndaǵy bólim­derimen tyǵyz baılanys jasap keledi. Qazirgi ýaqytta bizdiń oqý orny «Akademııalyq yqpal» baǵdarlamasynyń tu­raqty damýy úshin jumys is­teıtin jahandyq habqa aınaldy. Sonymen qatar, búginde QazUÝ-da eki IýNESKO kafedra­sy qyz­met atqaryp jatyr. Onyń biri buqaramen qatynas ornatý salalary boıynsha jýrnalıs­tıka fakýltetinde bolsa, ekinshisi geografııa jáne tabıǵatty paıdalaný fa­kýl­tetindegi turaqty damý jó­nindegi IýNESKO kafedrasy», dedi. Syrtqy ister mınıstrliginiń aıryqsha elshisi Maınur Mur­zamadıeva óz baıandamasynda elimizdiń joǵary saıası deńgeıi men halyqaralyq dárejesine toqtaldy. «El táýelsizdiginiń 25 jyly – Qazaq­stannyń BUU-men ıgilikti yntymaqtastyǵynyń 25 jylymen qatar keldi. Qazaq­stannyń BUU Qaýipsizdik keńe­sine turaqty emes múshe bolyp enýi de memleket úshin asa mańyzdy tarıhı jetis­tikterdiń biri bolyp tabylady. BUU Damý baǵdarlamasy EKSPO-2017 halyqaralyq kórmesine qatysatynyn resmı málimdep, BUU bastamasymen «jasyl» tehnologııalar men ınvestısııalyq jobalardy damytý jónindegi halyqaralyq ortalyq ashýǵa daıyn ekendigin jetkizdi», dedi ol. Qazaqstannyń álemdik uı­ymǵa alǵashqy qadamdary tarıh qoınaýyndaǵy qujattar men estelik sýretter arqyly kórsetilgen saltanatty jıynda sóz alǵan Qazaqstannyń BUU janyndaǵy tuńǵysh tu­raq­ty ókili, Cyrtqy ister mı­nıstrliginiń aıryqsha tapsyrmalar jónindegi elshisi Aq­maral Arystanbekova Qazaq­stan men atalmysh uıym­nyń 25 jyldyq hronologııasyna sholý jasaı otyryp, «Elimiz 25 jyl ishinde halyqaralyq qatynastar salasynda úlken joldan ótip, BUU-nyń bedel­di múshesine aınaldy. Atal­ǵan uıymmen ıgilikti ynty­maqtastyq aıasynda Qazaq­stan halyqaralyq arenada laıyqty orynǵa ıe», dedi. Elshi Qazaqstannyń ǵalamdyq ıadrolyq qarýsyzdandyrýǵa qosqan úlesin erekshe aıta kelip, Qazaqstannyń BUU-ǵa kir­genine 25 jyl tolýyna ar­nalǵan kitabyn tanystyrdy. Merekelik shara barysynda QHR, AQSh, Tájikstan, Qyrǵyzstan, Ázerbaıjan elderiniń jáne Reseı Federa­sııasynyń elimizdegi bas konsýldary sóz sóılep, Qazaq eline degen júrekjardy nıet-tilekterin bildirdi. Baıanda­masyn qazaqsha bastaǵan AQSh-tyń bas konsýly Mark Mýdıdyń aıtýynsha, Qazaqstan men AQSh halyqtarynyń uqsas tusy – ózderine degen senimdiligi jáne aldaryna qoıǵan maq­sattaryna qaıtse de jetýge tyrysatyn eńbekqorlyǵy. «Qazaqstan 25 jyldyń ishinde kóptegen jetis­tikterge jetti. Bir baı­qaǵanym, Qazaqstan dıplomattary óz elin, tarıhy men mádenıetin, ádebıeti men ult­tyq qundylyqtaryn joǵary dáre­jede kórsete bile­di», – dedi Mýdı myrza. Al BUU Turaqty úıles­tirýshisi, Qazaqstandaǵy BUU Damý baǵdarlamasynyń ókili No­rımas Shımomýra ózi joldaǵan arnaıy hatynda: «Qa­zaqstannyń turaqtylyq pen beıbitshilikti saqtap, qaýip­sizdikti qamtamasyz etýiniń ar­qasynda Ortalyq Azııada ıadro­lyq qarýdan azat aımaq qurý múmkindigi týdy», deı kele Qazaqstannyń turaqty damý salasynda kóshbasshylyq tanytyp, aımaqtyq jáne jahandyq qaýip­sizdikti qamtamasyz etý­degi júıeli jumysyn erekshe baǵalaǵan. Osy tusta aıtyp óter jaıt, Qazaqstan bastamasymen BUU Bas Assambleıasynyń ótken sessııasynyń qarary 2013-2022 jyldardy Mádenıetter jaqyndasýynyń halyqaralyq on jyldyǵy dep jarııalap, onyń resmı ulyqtaý rásimin Astanada ótkizgen edi. Búginde Qazaqstan kún tártibindegi álemdik ózekti máselelerdi qarastyryp, olar­dyń sheshimin tabýda óziniń dıplomatııalyq múmkindikterin barynsha kór­setip keledi. Astanada Iran ıadro­lyq máselesi boıynsha jáne Sırııa shıelenisi jónin­de nátıjeli kelissózder júrgi­zildi. Qazaqstanda BUU-men yn­tymaqtastyq aıasynda ekonomıka, ekologııa, áleýmet­tik damý salasyndaǵy halyq­aralyq quqyqtyń ilgeri damýyna, adam quqyǵynyń saqta­lýyna, lańkestikpen, uıym­dastyrylǵan qylmyspen jáne esirtki bıznesimen kúres salasyna erekshe nazar aýdarylýda. Mıra BAIBEK, «Egemen Qazaqstan» ALMATY