Golden Boy Promotions kompanııasynyń prezıdenti Erık Gomes WBO nusqasy boıynsha birinshi orta salmaqta álem chempıony meksıkalyq Saýl «Kanelo» Alvares (48-1-1, 34 KO) pen orta salmaqta WBA (Super), IBO, WBC jáne IBF belbeýleriniń ıegeri qazaqstandyq Gennadıı Golovkın (36-0, 33 KO) arasyndaǵy jekpe-jek jaıly pikir bildirdi.
Buǵan deıin Golovkın 10 maýsymda Astanada sharshy alańǵa shyǵatyny habarlanǵan. Sondaı-aq, onyń qarsylasy retinde orta salmaqta WBO chempıony brıtanııalyq Bıllı Djo Sonders (24-0, 12 KO) bolýy múmkin ekendigi jaıly aqparat taraǵan. Erık Gomestiń aıtýynsha, bul boks keshi uıymdastyrylsa, qyrkúıek aıynda Alvarespen jekpe-jegi ótpeı qalýy múmkin.
«Eger Golovkın Sonderspen boks keshin uıymdastyrar bolsa, «Kanelomen» ótetin kezdesýine kedergi keltirýi múmkin. Sonders jaıly ázirge eshnárse estimedim. Biraq bul is oryn alsa, bizdiń josparymyzǵa keri áserin tıgizedi. Sebebi, Golovkın-Alvares jekpe-jegin uıymdastyrý biraz ýaqytty qajet etedi. BAQ ókilderimen, taǵy da birneshe tarappen kelisimge kelý kerek», – dedi Alvarespen tyǵyz jumys isteıtin promoýterlik kompanııanyń prezıdenti RingTV-ǵa bergen suhbatynda.
«Gennadııdiń promoýteri Tom Leffler 10 maýsym kúni sharshy alańǵa shyǵý jóninde usynys baryn aıtqan, biraq bastysy Alvarespen kezdesý uıymdastyrý degen bolatyn. Eger Astanada ótetin boks keshinde sharshy alańǵa shyqsa, «Kanelomen» aıqasy keıinge shegerilýi múmkin», – dedi Golden Boy Promotions kompanııasynyń prezıdenti.
Aıta keteıik, 18 naýryz kúni AQSh-tyń Nıý-Iork qalasyndaǵy Madison Square Garden arenasynda Golovkın amerıkalyq Dennıel Djeıkobspen kezdesse, 6 mamyr kúni Las-Vegastaǵy «T-Mobile Arena» kesheninde Alvares otandasy kishi Hýlıo Sezar Chavespen judyryqtasady.