Úsh jyldan keıin Qazaqstan arqyly ótetin tranzıttik tasymaldan túsetin tabystyń kólemi 4 mlrd. dollarǵa jetýi tıis. Úkimettiń aldynda osyndaı mindet tur. Búgin Astanada ótken baspasóz máslıxatynda QR Investısııalar jáne damý mınıstrliginiń tranzıttik jáne kóliktik logıstıkany damytý departamenti dırektorynyń orynbasary Serik Bashımov atalǵan kórsetkishke jetý joldary jaıynda aıtyp berdi, dep xabarlaıdy QazAqparat.
"Qytaı - Eýropa - Qytaı baǵytyndaǵy temirjol qatynasy arqyly konteınerlik tasymaldan shamamen 1,5 mlrd. dollar túsedi degen boljam bar. Qytaı - Iran - Irak temirjolynan 400 mln., sondaı-aq Qytaı - Kavkaz - Ystanbul baǵytyndaǵy konteınerlik tasymaldan 400 mln. dollar túsýi tıis", - deıdi Bashımov.
Onyń aıtýynsha, búginde Qazaqstannyń áýe keńistigi arqyly jolaýshylardyń tranzıttik tasymaly da biraz paıda ákelip otyr. Sońǵy bes jylda atalǵan kórsetkish tórt esege ósti.
2012 jyly Qazaqstan terrıtorııasy arqyly ushyp ótetin jolaýshylardyń sany 120 000 adam bolsa, 2016 jylda olardyń sany 478 000 adamǵa artty. Aǵymdaǵy jyldyń sońynda jolaýshylardyń tranzıttik tasymaly 600 000 adamǵa jetedi degen boljam bar. О́tken jyly osy tasymaldan túsken tabystyń kólemi 267 mlrd. teńgeni quraǵan.
"Budan bólek, aqyly joldardy engizýdiń arqasynda Qazaqstan arqyly ótetin júkterden de tabys túsedi. Onyń jalpy kólemi 18 mln. dollarǵa deıin jetýi tıis", - dep atap kórsetti Bashımov.
Brıfıng kezinde ol "Astana - Temirtaý", "Almaty - Qorǵas" pen "Almaty - Qapshaǵaı" tas joldarynda aqyly júıeni engizý merzimin de jarııalady.
Aıta keteıik, búginde Úkimetke Qazaqstannyń tranzıttik áleýetin kóterý boıynsha úlken mindetter júktelip otyr. Atap aıtqanda, 2020 jylǵa deıin respýblıka arqyly tasymaldanatyn júk konteınerleriniń sany 2 mln. danaǵa, al áýe keńistigi arqyly ushyp ótetin tranzıttik jolaýshylardyń sany 1,6 mln. adamǵa jetýi tıis.