Keshe Májilis Tóraǵasy Nurlan Nyǵmatýlın bastaǵan palata depýtattary «Astana EKSPO-2017» kórmesiniń aýmaǵyn aralady. Olar kórme nysandary jumysymen tanysyp, halyqaralyq sharany uıymdastyrýǵa arnalǵan jıynǵa qatysty.
Jınalys barysynda orasan zor jumystar atqarylǵanyn alǵa tartqan Májilis Tóraǵasy týra úsh aıdan keıin elordamyz «jasyl energetıka» salasynda álemdik úzdik ázirlemelerdi pash etetin ortalyqqa aınalatynyn atap ótti. «Qazaqstan Prezıdenti Nursultan Ábishuly Nazarbaevtyń halyqaralyq joǵary bedeliniń arqasynda bizdiń elimiz osy ǵajaıyp ári biregeı sharany ótkizýge múmkindik aldy», – dedi N.Nyǵmatýlın.
Onyń pikirinshe, aýqymdy sharany uıymdastyrýda belgili bir deńgeıde depýtattyq korpýstyń da óz úlesi bar. Máselen, Parlamentte Halyqaralyq kórmeler týraly konvensııa ratıfıkasııalandy, EKSPO-2017 halyqaralyq mamandandyrylǵan kórmesi máseleleri jóninde arnaıy zań qabyldandy.
Aıta keteıik, «Bolashaqtyń energııasy» dep atalatyn ulttyq jobanyń basty maqsaty qoǵam nazaryn elektr qýatyn oryndy jumsaý máselesine aýdara otyryp, energııa qýatyn taýsylmaıtyn ınnovasııalyq energııa qýatymen almastyrý bolyp tabylady.
Alqaly keńeske «Astana EKSPO-2017» Ulttyq kompanııasy basqarmasynyń tóraǵasy Ahmetjan Esimov pen basqa da jaýapty departamentterdiń basshylary qatysyp, depýtattar nazaryna kórme jumysy jaıynda tolyqqandy málimetter usyndy. Sonymen qatar, aldaǵy josparlar jaıynda da tyńǵylyqty baıandady. Al kórme jumysymen jaqynnan tanysý kezinde Májilis depýtattary Qazaqstannyń ulttyq sfera-pavılony men halyqaralyq deńgeıdegi pavılondarǵa, Kongress-ortalyqqa, biryńǵaı qyzmet kórsetý ortalyǵyna, EKSPO-qalashyq syndy nysandarǵa aıryqsha nazar aýdardy.
Esterińizge sala keteıik, Ulttyq pavılonnyń qurylysy 2017 jyldyń mamyr aıynda tolyqtaı aıaqtalady dep josparlanýda. Sondyqtan da bul nysanda ishki qurylys jumystary qyzý júrgizilý ústinde.
Shara aıasynda depýtattar EKSPO-2017 halyqaralyq mamandandyrylǵan kórmesine bıletter satyp aldy.
Nurlybek DOSYBAI,
«Egemen Qazaqstan»