Investısııalar jáne damý mınıstrliginiń ókilderi Memleket basshysy Nursultan Nazarbaevtyń Qazaqstan halqyna arnaǵan dástúrli Joldaýyn júzege asyrý jáne qoldaý maqsatynda baspasóz máslıhatyn ótkizdi. Onda vedomstvonyń tranzıttik jáne kóliktik logıstıkany damytý departamenti dırektorynyń orynbasary Serik Bashımov 2020 jylǵa qaraı tranzıttik tasymaldyń jyldyq kólemin arttyrýdy qamtamasyz etý jónindegi sharalarmen tanystyrdy.
«Qazaqstannyń geografııalyq ornalasýy Azııa – Eýropa baǵyty boıynsha júk tasymaldaýda qolaıly jaǵdaı týdyrady. Osy maqsatta kólik-logıstıka keshenin damytý, transqazaqstandyq dálizderdiń jańa sáýletin qalyptastyrý mınıstrlik jumysynyń basym baǵyty. О́tken jyly tranzıttik tasymaldan 267 mlrd teńge paıda tústi, bul burnaǵy jylǵy kórsetkishten 40 paıyzǵa artyq», dedi S.Bashımov. Onyń aıtýynsha, úsh jyldan keıin Qazaqstan arqyly ótetin tranzıttik tasymaldan túsetin tabystyń kólemi 4 mlrd dollarǵa jetýi tıis. Úkimettiń aldynda osyndaı mindet tur.
«Qytaı – Eýropa – Qytaı baǵytyndaǵy temir jol qatynasy arqyly konteınerlik tasymaldan shamamen 1,5 mlrd dollar túsedi degen boljam bar. Qytaı – Iran – Irak temir jolynan 400 mln, sondaı-aq, Qytaı – Kavkaz – Ystanbul baǵytyndaǵy konteınerlik tasymaldan 400 mln dollar túsýi tıis», degen mınıstrlik ókili Qazaqstannyń áýe keńistigi arqyly jolaýshylardyń tranzıttik tasymaly da paıda ákeletinin aıtty. Sońǵy bes jylda atalǵan kórsetkish tórt esege ósken. 2012 jyly Qazaqstan terrıtorııasy arqyly ushyp ótetin jolaýshylardyń sany 120 myń adam bolsa, 2016 jylda olardyń sany 478 myń adamǵa artty. Aǵymdaǵy jyldyń sońynda jolaýshylardyń tranzıttik tasymaly 600 myń adamǵa jetedi degen boljam bar. О́tken jyly osy tasymaldan túsken tabystyń kólemi 267 mlrd teńgeni quraǵan.
Tranzıttik jáne kóliktik logıstıkany damytý departamenti dırektorynyń orynbasary Serik Bashımovtiń málimetinshe, aqyly joldardy engizýdiń arqasynda Qazaqstan arqyly ótetin júkterden de tabys túsedi. Onyń jalpy kólemi 18 mln dollarǵa deıin jetýi kerek.
Ashat RAIQUL,
«Egemen Qazaqstan»