22-naýryzda “Egemen Qazaqstan” gazetiniń jańa saıty iske qosylady. Bul týraly búgin Astanadaǵy Ulttyq kitaphanada “Egemen Qazaqstan” gazeti qolǵa alǵan jobalardy tanystyrý barysynda habarlandy.
Jıyn barysynda basylym jetekshisi Darhan Qydyráli saıtty jetildirý jumystarynyń sońǵy alty aıdaǵy jetistikterine toqtaldy. “Aqparattar taspasynan beriletin materıaldar sany tórt ese kóbeıdi. Internet-redaksııa derbes basylym retinde ózi daıyndaıtyn sapaly aqparattardy kóbeıtýge basymdyq berdi. Ol maqalalardyń keıbiri otyz myńǵa deıin oqylyp, oqyrmandar arasynda úlken rezonans týǵyzdy. Qazaqstandyq saıttardyń jalpy reıtınginde egemen.kz ótken jyldyń birinshi jartysynda 140-orynda tursa, qazir alǵashqy 50-ge kiredi. Al qazaqtildi ınternet basylymdar arasynda alǵashqy bestikte. Sonymen qatar tóte jazý nusqasyn jetildirý arqasynda shetelderdegi qandastarymyzdyń saıtqa kirýi jıiledi”, dedi basylym basshysy.
Basylymnyń jańa ınternet nusqasynyń tehnıkalyq erekshelikterin “Egemen Qazaqstannyń” qyzmetkeri, SEO-ınjener Erbol Serikbaı tanystyrdy. Jańa saıtta 2005 jyldan bergi materıaldar bir júıege toptastyrylady. Endi qajet materıaldy tabý úshin ár kezeńde jasalǵan saıttarǵa kirý qajet emes. Barlyq aqparatty bir saıttan tabýǵa bolady.
Jańa nusqadaǵy saıtta aýdıo jáne vıdeo materıaldarǵa kóbirek oryn beriledi. Mysaly, gazet sholýshylarynyń maqalalary aýdıoformatta usynylady. Olardy tyńdaýǵa jáne júktep alýǵa múmkindik bar.
Jańa portaldyń ereksheligi, «Egemen Qazaqstan» gazeti men Ulttyq biryńǵaı testileý ortalyǵynyń birlesken jobasy negizinde daıyndyq testerin onlaın tapsyrýǵa bolady.
Sonymen qatar, shet elderden kiretin oqyrmandarǵa yńǵaıly bolýy úshin latyn jáne tóte jazýdaǵy nusqa bolady jáne gazette orystildi nusqa iske qosylady. “Buryn orys tilindegi materıaldar qazaqshaǵa aýdarylsa, endi qazaq tilindegi materıaldar oryssha jaryq kórip, orystildi aýdıtorııaǵa baǵyttalady”, dedi gazet jetekshisi Darhan Qydyráli.