Ispanııanyń «Barselona» fýtbol klýby bas juldyzy Lıonel Messımen kelisimshartyn uzartqan jaǵdaıda oǵan qosymsha 40 mıllıon eýro syıaqy berýdi josparlap otyr. Bul týraly «R-Sport» basylymy habarlady.
Argentınalyq shabýlshynyń qazirgi kelisimsharty bir jylǵa deıin jaramdy. Jyldyq jalaqysy – 22,8 mıllın eýro.
О́tken jyldyń qazan aıynda katalondyq klýb esep berý kezinde kelisim ýaqytyn uzartqany úshin úsh fýtbolshyǵa 64 mıllıon eýro bonýs tólegenin málimdegen bolatyn. Biraq olardyń esimderi jasyryn kúıde qalǵan. Al óz kezeginde Mundo Deportivo basylymy Haver Maskerano, Serhıo Býskets jáne Neımar ekenin habarlady. Bul tusta brazılııalyq shabýylshy 30 mıllıon eýro aldy degen aqparat ta taraǵan.
Buǵan deıin Ispanııanyń birneshe BAQ ókilderi klýbtyń Messımen 2022 jylǵa deıin kelisim ýaqytyn sozýǵa nıetti ekenin jazǵan. Bul is oryn alǵan jaǵdaıda 29 jastaǵy shabýylshy álemdegi jalaqysy eń joǵary fýtbolshy atanbaq.
Aıta keteıik, Messı mansabyn dál osy «Barselonada» bastaǵan. Katalondyqtardyń sapynda segiz dúrkin el chempıony atansa, tórt márte Ispanııa Kýbogyna qol jetkizgen. Sonymen qatar, tórt márte Chempıondar lıgasynda top jarsa, úsh retten ÝEFA Sýperkýbogy men klýbtar arasyndaǵy álem chempıonatynda jeńiske jetken bolatyn