QR Parlamenti Senatynyń depýtaty Darhan Qaletaevtyń aıtýynsha, Konstıtýsııaǵa engizilgen ózgerister boıynsha Otanyn satqandar azamattyqtan aıyrylady, dep habarlaıdy QazAqparat tilshisi.
Astanada ótken baspasóz máslıhatynda jýrnalıster osy ózgeristerge qatysty túsinikteme berýdi surady. Sebebi atalǵan ózgeristerge sáıkes, terrorıstik qylmystarmen qatar eldiń asa mańyzdy múddelerine zııan keltirgeni úshin azamattyqtan aıyrý jazasy qarastyrylǵan. Ondaı sheshim sottyń úkimimen shyǵarylady. Jýrnalıster «eldiń asa mańyzdy múddelerine zııan keltiretin» qylmystardyń maǵynasyn ashyp berýdi ótindi.
«Memlekettik opasyzdyq, eldi satqany úshin», - dedi senator Qaletaev.
Al osyny keńirek jazýdyń qajettiligine qatysty ol: «Konstıtýsııada onyń bárin táptishtep jazýdyń qajeti joq sııaqty. Sebebi ondaı jaza báribir sottyń sheshimimen shyǵarylady. Al naqty jazaǵa keler bolsaq, jańa ǵana aıttym ǵoı, ol - memlekettik opasyzdyq. Bálkim, memleketke iri kólemde shyǵyn keltirgeni úshin... Endi, taǵy aıtamyn, ony sot anyqtaıdy», - dep atap kórsetti.