«Bas jarylyp, kóz shyqsa» da qyńq demeı, júre beretin qazaǵymnyń búgingi urpaqtary usaqtalyp bara jatqan sııaqty. Bulaı taýsyla sóıleýimizge jergilikti sottardyń birinde Qylmystyq kodekstiń 109-baby boıynsha jeke aıyptaý isiniń qaralýy edi. «E, kim sotqa júginbeı jatyr» deýi múmkin oqyrmandardyń biri. Bar gáp kezinde myńjyldyq týystyqtyń belgisi retinde tós qaǵystyryp, quıryq-ba-ýyr jesken qudalar arasyndaǵy eregistiń ábden shıryǵý shegine jetip, bir-birimen sottasýynda bolyp otyr.
Aýylda turatyn jas otaý ıeleri arasynda tutanǵan kezekti aıǵaı-shýdan keıin kelinshektiń shydamy ábden taýsylsa kerek, oblys ortalyǵynda turatyn aǵalaryna shaǵymdanady. Araq iship alsa, «batyrsynyp» ketetin kúıeýiniń shoıyn judyryǵy bata tıgen syqyldy. Kóz jasyn kóldeı etip, telefon qońyraýlatqan qaryndasynyń qulyn daýsy shyrqyraı shyqsa, «urysta – turys» bolýshy ma edi? Ashýǵa erik bergen qarýly jigitter kúıeý balalaryn da, arashaǵa túsken qudalaryn da sabap tastaıdy. Ábden jer bolǵan qudalardyń biri ar-namysynyń aıaqqa taptalǵanyn kóldeneń tartyp, sotqa talap-aryz túsiredi.
Sot kezinde qos tarap ýaǵdalasýdyń ornyna eski jaranyń aýzyn qoparyp, bir-birin kinálaýǵa tyrysady. Teketires ýshyǵyp bara jatqannan keıin sot eki jaqty qazaqy jolmen bitistirmek nıetpen aýyl aqsaqaldarynyń bátýaly bıligine júginedi. «Ataly sózge er toqtar» degen. Jón sózge qulaq asqan qudalar bir-birin keshirip, qaıtadan tós qaǵystyrady.
Bir qyzyǵy, erli-zaıyptylar sol kúni-aq tatýlasqan kórinedi.
О́mir ESQALI,
«Egemen Qazaqstan»
Soltústik Qazaqstan oblysy