Qazaqstan Respýblıkasynyń Memlekettik hatshysy Gúlshara Ábdiqalyqovanyń tóraıymdyǵymen Shetelde kadrlar daıarlaý jónindegi respýblıkalyq komıssııanyń kezekti otyrysy ótti.
Otyrysta Qazaqstan Prezıdenti N.Á.Nazarbaevtyń «Qazaqstannyń Úshinshi jańǵyrýy: jahandyq básekege qabilettilik» atty Joldaýynda aıqyndalǵan mindetterge sáıkes «Bolashaq» halyqaralyq stıpendııasyn odan ári jetildirýdiń tásilderi talqylandy. Memlekettik hatshy qoıylǵan maqsattarǵa qol jetkizý kóbinese bilimniń sapaly bolýyna baılanysty ekenin atap ótti. Sondyqtan baǵdarlamany jetildirý eldiń adamı kapıtalynyń básekege qabilettiligin arttyrýǵa septigin tıgizetin bolady.
G.Ábdiqalyqova osy maqsatpen quramyna múddeli memlekettik organdardyń ókilderi, qazirgi zamanǵy halyqaralyq bilim berý salasynyń sarapshylary men «Bolashaq» baǵdarlamasynyń túlekteri engen Jumys toby qurylǵanyn atap ótti. Ol «Qazaqstan-2050» Strategııasynda, «100 naqty qadam» Ult josparynda aıqyndalǵan basymdyqtardy eskere otyryp, usynystar ázirledi.
Otyrys barysynda Jumys tobynyń usynystary talqylandy. «Bolashaq» stıpendııasyn úsh baǵytta: 1) strategııalyq mindetterge sáıkes adamı kapıtaldyń jahandyq básekege qabilettilik jolynda stıpendııanyń rólin aıqyndaý jáne kúsheıtý; 2) stıpendıattardy irikteýdiń jańa qadamdaryn qalyptastyrý; 3) túlekterdiń áleýetin júzege asyrýdy kúsheıtýdi odan ári jetildirý kózdelýde.
Eldiń ornyqty damýyn qamtamasyz etý jáne onyń uzaq merzimdi perspektıvada jahandyq básekege qabilettiligin arttyrý maqsatynda jastardyń joǵary deńgeıli bilim alýyna ınvestısııalar salýdy talap etedi. Baǵdarlamany iske asyrý tásilderin ońtaılandyrý úmitkerlerdi irikteý júıesi men olarǵa qoıylatyn talaptardy jetildirýge, úmitkerlerdiń aǵymdaǵy jáne keleshektegi áleýetin anyqtaýǵa, bilim berýdiń basym baǵyttaryn anyqtaýǵa jáne sheteldik joǵary oqý oryndaryna qoıylatyn talaptardy qaıta qaraýǵa baǵyttalatyn bolady.
Jumys tobynyń usynystary odan ári pysyqtalýy úshin el Úkimetine joldandy.
Joldybaı BAZAR,
«Egemen Qazaqstan»