Parlament Senatynda Qarjy jáne bıýdjet komıtetiniń basshysy Qaırat Ishanovtyń tóraǵalyq etýimen «Keden odaǵy – ıntegrasııanyń ózara tıimdi pishini» taqyryby boıynsha dóńgelek ústel otyrysy boldy, dep habarlady osy palatanyń baspasóz qyzmeti.
Otyrysty asha kelip, Q.Ishanov Keden odaǵynyń qyzmetin retteıtin zańnamany odan ári jetildirý turǵysynda talqylaýlardyń mańyzdylyǵyn atap ótti. Senator atap ótkendeı, qazirgi kezde Keden odaǵy aýmaǵyna biryńǵaı keden tarıfteri engizildi, keden alymdary men ekonomıkalyq shekteýler alynyp tastaldy. Bul, sarapshylardyń pikirinshe, Keden odaǵyna qatysýshy memleketterdiń ishki jalpy ónimin 5 jyl boıy 15 paıyzǵa ulǵaıtýǵa múmkindik beredi. Q.Ishanovtyń aıtýynsha, memleketter arasyndaǵy kedergilerdiń joıylýy men taýarlardyń erkin qozǵalysy básekelestikti damytýǵa yqpal etedi, ol óz kezeginde óndiriletin ónim men baǵany tómendetýge járdemdesedi.
Biryńǵaı ekonomıkalyq keńistik máselelerine qatysty senator BEK aıasyndaǵy yqpaldastyq úderisterin damytý saýda jáne ekonomıkalyq qatynastardy odan ári tereńdetýge, qatysýshy memleketterdiń syrtqy naryqtardaǵy básekege qabilettiligin arttyrýda birigýge yqpal etetinin aıtty. «BEK-tiń qurylýy halyqtyń shekara asýyna shekteýdi alyp tastaı otyryp, biryńǵaı eńbek rynogyn qalyptastyrýǵa, jumyssyzdyq deńgeıin retteý saıasatyn kúsheıtýge múmkindik beredi», dedi Q.Ishanov.
Talqylaý barysynda sóz alǵan senator N.Nurmanbetov yqpaldastyq turǵysynda birlesý is-qımylyn quqyqtyq turǵydan qamtamasyz etýge nazar aýdardy. Keden odaǵynyń Keden kodeksi týraly kelisim 2010 jyldyń 1 shildesinen bastap kúshine engennen keıin Belarýs, Qazaqstan men Reseı Federasııasynyń biryńǵaı keden aýmaqtarynda kedendik retteýdiń biryńǵaı júıesi jumys isteı bastady.
Parlament Senaty Keden odaǵynyń kelisim-quqyqtyq bazasyn nyǵaıtý, biryńǵaı keden tarıfin engizý úshin jaǵdaı qalyptastyrý, syrtqy saýda jáne kedendik retteý, sanıtarlyq, veterınarııalyq jáne fıtosanıtarlyq baqylaý jónindegi (30-dan astam) zań jobalaryn qabyldady. Keden odaǵynyń ınstıtýttyq qurylymdaryn damytý jónindegi baza qalyptasty.
Keden odaǵynyń biryńǵaı kedendik aýmaqtarynda birdeı kedendik ákimshiliktendirýdiń túrleri men tásilderin qamtamasyz etý maqsatynda halyqaralyq kelisimderdiń jobalary qosymsha ázirlendi. Ol EýrAzEQ aıasyndaǵy Keden odaǵyna múshe memleketterdiń keden qyzmetteri ókildikteriniń keden isteri jónindegi yntymaqtastyǵy men ózara kómekti, Keden odaǵynyń syrtqy shekarasyndaǵy kólik baqylaýyn júzege asyrý, Keden odaǵyna múshe memleketter keden qyzmetteriniń birlesken áriptestigi qujattary.
«Dóńgelek ústel» otyrysynda ózara saýda barysyndaǵy taýarlardyń erkin aınalymyn qamtamasyz etý, úshinshi eldermen saýda úshin qolaıly jaǵdaı týǵyzý, Keden odaǵyna múshe memleketterdiń ekonomıkalyq yntymaqtastyǵyn odan ári damytý týraly depýtattardyń saýaldaryna ekonomıkalyq damý jáne saýda mınıstriniń orynbasary Q.Bıshimbaev jaýap berdi.
Sharada sóz alǵan Qarjy mınıstriniń orynbasary R.Dálenov, Aýyl sharýashylyǵy mınıstriniń orynbasary S.Hasenov, Kólik jáne kommýnıkasııa mınıstriniń orynbasary A.Bekturov, Densaýlyq saqtaý mınıstriniń orynbasary E.Baıjúnisov, «Atameken» odaǵy» Qazaqstan ulttyq ekonomıkalyq palatasy basshysynyń orynbasary A.Evnıev, Indýstrııa jáne jańa tehnologııalar mınıstrligi ónerkásip komıtetiniń tóraǵasy A.Taspıhov alys sheteldermen yntymaqtastyqtyń keleshegi, memlekettik organdardyń bıznes ortalarymen ózara is-qımyly, tranzıttik-kólik áleýetin, biryńǵaı kedendik-tarıftik retteý salasyndaǵy quqyq qoldaný tájirıbesin damytý týraly depýtattardyń kóptegen saýaldaryna jaýap berdi.
Talqylaý nátıjesi boıynsha tıisti usynys ázirlendi.